“క్రీస్తునందు” ఉండటం అంటే ఏమిటి?

మన ప్రభువైన యేసుక్రీస్తు యొక్క తండ్రియగు దేవుడు స్తుతింపబడును గాక. ఆయన క్రీస్తునందు పరలోక విషయములలో ఆత్మ సంబంధమైన ప్రతి ఆశీర్వాదమును మనకనుగ్రహించెను. ఎట్లనగా తన ప్రియునియందు తాను ఉచితముగా మనకనుగ్రహించిన తన కృపా మహిమకు కీర్తి కలుగునట్లు, తన చిత్తప్రకారమైన దయా సంకల్పము చొప్పున, యేసుక్రీస్తు ద్వారా తనకు కుమారులనుగా స్వీకరించుటకై, మనలను ముందుగా తన కోసము నిర్ణయించుకొని, మనము తన యెదుట పరిశుద్ధులమును నిర్దోషులమునై యుండవలెనని జగత్తు పునాది వేయబడకమునుపే, ప్రేమచేత ఆయన క్రీస్తులో మనలను ఏర్పరచుకొనెను. దేవుని కృపా మహదైశ్వర్యమును బట్టి ఆ ప్రియునియందు ఆయన రక్తము వలన మనకు విమోచనము, అనగా మన అపరాధములకు క్షమాపణ మనకు కలిగియున్నది. కాలము సంపూర్ణమైనప్పుడు జరుగవలసిన యేర్పాటును బట్టి, ఆయన తన దయా సంకల్పము చొప్పున తన చిత్తమును గూర్చిన మర్మమును మనకు తెలియజేసి, మనకు సంపూర్ణమైన జ్ఞాన వివేచన కలుగుటకు, ఆ కృపను మనయెడల విస్తరింపజేసెను. ఈ సంకల్పమును బట్టి ఆయన పరలోకములో ఉన్నవేగాని, భూమి మీద ఉన్నవే గాని, సమస్తమును క్రీస్తునందు ఏకముగా సమకూర్చవలెనని తనలో తాను నిర్ణయించుకొనెను.
మరియు క్రీస్తునందు ముందుగా నిరీక్షించిన మనము తన మహిమకు కీర్తి కలుగజేయవలెనని, దేవుడు తన చిత్త ప్రకారమైన సంకల్పమును బట్టి మనలను ముందుగా నిర్ణయించి, ఆయనయందు స్వాస్థ్యముగా ఏర్పరచెను. ఆయన తన చిత్తానుసారముగా చేసిన నిర్ణయము చొప్పున సమస్త కార్యములను జరిగించుచున్నాడు. మీరును సత్య వాక్యమును, అనగా మీ రక్షణ సువార్తను విని, క్రీస్తునందు విశ్వాసముంచి, వాగ్దానము చేయబడిన ఆత్మచేత ముద్రింపబడితిరి. దేవుని మహిమకు కీర్తి కలుగుటకై ఆయన సంపాదించుకొనిన ప్రజలకు విమోచనము కలుగు నిమిత్తము ఈ ఆత్మ మన స్వాస్థ్యమునకు సంచకరువుగా ఉన్నాడు. (ఎఫెసీయులకు 1:3-14)

“మీ విశ్వాసం గురించి ప్రజలు మిమ్మల్ని అడిగినప్పుడు మీరు ఏమని సమాధానం చెబుతారు? ‘నేను ప్రెస్బిటేరియన్‌ని’ అని గానీ, ‘బాప్టిస్ట్‌ని’ అని గానీ లేదా ‘ఎపిస్కోపేలియన్‌ని’ అని గానీ… ఇలా మీ శాఖల పేర్లతో పరిచయం చేసుకుంటారా? లేక అవేవీ లేకుండా కేవలం ‘నేను ఒక క్రైస్తవుడిని’ అని మాత్రమే చెప్తారా?”

“కొత్త నిబంధన కాలంలోని విశ్వాసులను తమను తాము పరిచయం చేసుకోమని అడిగితే, వారు ‘మేము క్రైస్తవులము’ అని చెప్పుకునేవారు కాదు.  బహుశా ఈ విషయం మనలో చాలామందికి ఎప్పుడూ స్ఫురించి ఉండకపోవచ్చు. నిజానికి, కొత్త నిబంధనలో ‘క్రైస్తవుడు’ అనే పదం కేవలం మూడు సార్లు మాత్రమే కనిపిస్తుంది. శిష్యులకు మొదటిసారిగా అంతియొకయలో ‘క్రైస్తవులు’ అని పేరు పెట్టారు (అపొస్తలుల కార్యములు 11:26). ఆ తర్వాత, రాజైన అగ్రిప్ప అపొస్తలుడైన పౌలుతో అన్న మాటలను బట్టి చూస్తే, ఆ పదాన్ని ఆయన ఒక వెటకారంగానో లేదా ఈసడింపుగానో వాడినట్లు అనిపిస్తుంది: ‘ఇంత తక్కువ సమయంలోనే నన్ను క్రైస్తవునిగా మార్చేద్దామనుకుంటున్నావా?’ (అపొస్తలుల కార్యములు 26:28). ఇక చివరిగా, ఒకరు ‘క్రైస్తవునిగా’ అనుభవించే శ్రమల గురించి పేతురు తన మొదటి పత్రికలో ప్రస్తావించాడు (1 పేతురు 4:16).”

“ఈ మూడు సందర్భాల్లోనూ ‘క్రైస్తవుడు’ అనే పదాన్ని గమనిస్తే, అది బహుశా సువార్త విరోధులు సృష్టించిన ఒక ‘అవమానకరమైన పదం’ లేదా ఒక రకమైన ‘ద్వేషపూరిత మాట’ అయి ఉండవచ్చు. పదిహేడవ శతాబ్దంలో ‘ప్యూరిటన్’ అనే పదాన్ని ఏ విధంగానైతే  ఒక హేళనగా వాడారో, లేదా నేడు ‘ఫండమెంటలిస్ట్’ అనే పదాన్ని ఏ విధంగానైతే ఈసడింపుగా వాడుతున్నారో, అప్పట్లో ఈ పదం కూడా ఖచ్చితంగా ఒక దూషణగానే ఉండి ఉండవచ్చు. నిజానికి, ఇవి విద్వేషపూరిత పదాలు. ఒకవేళ ‘క్రైస్తవుడు’ అనే పదం మొదట ఇలాంటి ఉద్దేశంతోనే వాడుకలోకి వచ్చినట్లయితే, లూకా తన అపొస్తలుల కార్యములలో ‘శిష్యుడు’ అనే పదాన్ని ఎందుకు ఎక్కువగా ఎంచుకున్నాడో మనకు సులభంగా అర్థమవుతుంది (ఉదాహరణకు అపొస్తలుల కార్యములు 6:1; ఇలాంటివి దాదాపు ఇరవైకి పైగా ఉదాహరణలు ఉన్నాయి). అంతేకాకుండా, ఆయన అప్పుడప్పుడు విశ్వాసులను ‘ఈ మార్గము’ అనుసరించే వారిగా ఎందుకు అభివర్ణించాడో కూడా మనం గ్రహించవచ్చు (అపొస్తలుల కార్యములు 9:2; 22:4; 24:14). ఎందుకంటే, ‘నేనే మార్గమును’ (యోహాను 14:6) అని సెలవిచ్చిన ఆయన్నే వారు అనుసరించారు.”

“అయితే, ఒకవేళ మీరు పౌలును ‘మీ గురించి మీరు ఏమని చెప్పుకుంటారు?’ అని అడిగితే, అతని సమాధానం బహుశా పైన చెప్పిన వాటిలో  ఏదీ అయి ఉండేది కాదు. దానికి బదులుగా, అతను ‘నేను క్రీస్తునందున్న వాడను’ అని సమాధానం ఇచ్చి ఉండేవారు.”

“నేను యవ్వన ప్రాయంలో ఉన్నప్పుడు, 2 కొరింథీయులకు 12:1-10 వచనాలను చదివినట్లు నాకు గుర్తుంది. ఆ వాక్యభాగంలో పౌలు తనకు కలిగిన అసాధారణమైన ప్రత్యక్షతల గురించి, అలాగే తాను అతిశయించకుండా ఉండటానికి తన శరీరంలో ఉంచబడిన ఆ ‘ముల్లు’ గురించి మాట్లాడుతాడు. ఆ వాక్యభాగాన్ని పరిచయం చేస్తూ, దేవుని అద్భుతమైన కృపను, అసాధారణమైన ప్రత్యక్షతలు చూసే  గొప్ప భాగ్యం పొందిన ‘క్రీస్తునందున్న ఒక మనుష్యుడు’ తనకు తెలుసునని అతడు చెబుతాడు. ఆ ప్రత్యక్షతలు ఎంతటి గొప్పవంటే, వాటిని ఇతరులకు వివరించడం తగదని అతడు భావించాడు. ‘పౌలు చెబుతున్న ఈ అజ్ఞాత వ్యక్తి ఎవరు?’ అని అప్పట్లో నేను ఆశ్చర్యపోయినట్లు నాకు గుర్తుంది. బహుశా నా ఆలోచన శక్తి మందకొడిగా ఉండటం వల్లేమో కానీ, ఆ ‘మనుష్యుడు’ ఎవరో నాకు చాలా ఆలస్యంగా అర్థమైంది, అది పౌలు తన గురించే మాట్లాడుతున్నాడు! తనను తాను పరిచయం చేసుకోవడానికి ఆయన ఎంచుకున్న ప్రధానమైన మార్గం ఇదే, ఎందుకంటే, తన గురించి అతనికి ఉన్న అత్యంత ప్రాథమికమైన అవగాహన కూడా ఇదే. ఆయన ‘క్రీస్తునందున్న మనుష్యుడు’.”

“ముందుగా, ‘క్రీస్తునందు’ అనే ఈ రెండు పదాలను, అలాగే వాటికి సమానమైన ఇతర పదాలను (ఉదాహరణకు, ‘ఆయనయందు’) మీ మనస్సులో బాగా గుర్తుంచుకోండి. ఆ తర్వాత, మీ బైబిల్లో పౌలు రాసిన పదమూడు పత్రికలు ఉన్న ఆ అరవై పేజీలను ఒక్కసారి త్వరగా అలా తిరగేసి చూడండి. అక్కడ మీకు ‘క్రీస్తునందు’ అనే పదం లేదా దానికి సంబంధించిన ఇతర పదాలు ఎనభైకి పైగా కనిపిస్తాయి. ఇక దానికి సమానమైన ‘ప్రభువునందు’ (లేదా కొన్నిసార్లు ‘ప్రభువైన యేసునందు’) అనే పదాలను కూడా లెక్కగడితే, ఆ సంఖ్య దాదాపు రెట్టింపు అవుతుంది.”

మీరు దీనిని ఇంతకుముందెన్నడూ గమనించకపోతే, పౌలు ఈ పదాలను ఎంత తరచుగా ఉపయోగిస్తాడో చూసి ఖచ్చితంగా ఆశ్చర్యపోతారు. అంతేకాదు, ఇన్ని రోజులూ వీటిపై మనం ఎందుకు అంతగా శ్రద్ధ పెట్టలేకపోయామా అని కూడా ఆలోచనలో పడతారు. నిజానికి, ఒక క్రైస్తవుడిగా ఉండటం అంటే ఏమిటో వివరించడానికి పౌలు ఎంచుకున్న ప్రాథమిక మార్గం ఇదే. కానీ, ఇంతటి ప్రాముఖ్యత కలిగిన ఈ చిన్న పదబంధాన్ని గమనించకుండానే, మనం పౌలు రాసిన పత్రికలను ఏళ్ల తరబడి, దశాబ్దాల తరబడి చదువుతూ గడిపేయడం కూడా సాధ్యమే.

ఈ రెండు పదాలు, అంటే ‘లో’ అనే ఆ చిన్న విభక్తి ప్రత్యయం, అలాగే ‘క్రీస్తు’ అనే బిరుదు, ఈ రెండు పదాలే ఈ పుస్తకానికి ప్రధానాంశాలు. ఈ పుస్తకం ముగిసేసరికి, బహుశా కేవలం రెండే రెండు పదాల గురించి ఇంత సుదీర్ఘమైన వివరణను మీరెప్పుడూ చదివి ఉండరని మీకనిపించినా ఆశ్చర్యం లేదు! అయినప్పటికీ, ఈ పుస్తకంలోని అంశాలు అత్యంత గొప్పదైన, అద్భుతమైన ఈ సత్యంలో కేవలం పైపైన ఉన్న విషయాలను మాత్రమే మీకు పరిచయం చేస్తాయి. కానీ, ‘క్రీస్తునందు ఉండటం’ అంటే అసలు అర్థం ఏమిటో వివిధ బైబిల్ కోణాల నుండి లోతుగా పరిశీలించడానికి ఈ పుస్తకం మిమ్మల్ని ప్రోత్సహిస్తుందని నేను ఆశిస్తున్నాను. మీరు గనుక ఆయనకు చెందినవారైతే, మీ దైనందిన జీవితంలో ప్రతిరోజూ మీరు ఎవరో చెప్పడానికి ఇంతకంటే గొప్ప పరిచయం లేదు – మీరు ‘క్రీస్తులో’ ఉన్న ఒక పురుషుడు లేదా స్త్రీ.

ఒక క్రొత్త నిబంధన పండితుడు ఎత్తి చూపినట్లుగా, ‘ది గాడ్ ఫాదర్’ సినిమాలో ‘మాఫియా’ అనే పదాన్ని ఎక్కడా ఉపయోగించలేదు; అయినప్పటికీ, ఆ సినిమా అంతటా అంతర్లీనంగా ఉన్న ప్రధానాంశం అదే.1 అదే విధంగా, అపొస్తలుడైన పౌలు కొన్ని చోట్ల ‘క్రీస్తునందు’ అనే నిర్దిష్టమైన పదజాలాన్ని ఉపయోగించకపోయినా, క్రైస్తవ జీవితం గురించి అతడు బోధించిన ప్రతి మాటకూ అదే సారాంశం మరియు ప్రాథమికమైన పునాది. అంతేకాకుండా, ఒక విశ్వాసి వ్యక్తిగత జీవితంలోనైనా లేదా ఒక సంఘంలోనైనా ఎదురయ్యే అనేక సమస్యలకు ఈ సత్యమే అసలైన పరిష్కారం.

అసలు ‘క్రీస్తునందు’ ఉండటం అంటే ఏమిటో క్రొత్త నిబంధన ఎక్కడా ఒక నిర్వచనంలా వివరించదు. దాని ప్రాముఖ్యతను గ్రహించడానికి ఉత్తమ మార్గం, ఆ పదబంధం వెనుక ఉన్న అర్థాలను వివరించే వివిధ లేఖన భాగాలను లోతుగా ధ్యానించడమే ఉత్తమ మార్గం. మొదటగా, ‘క్రీస్తునందు’ ఉండటం అంటే ఏమిటో ప్రాథమికంగా అవగాహన చేసుకోవడమే మనము వేయవలసిన మొదటి అడుగు. అందుకు ఉత్తమ మార్గం, ఎఫెసీయులకు పౌలు రాసిన పత్రిక మొదటి అధ్యాయంలో ఈ పదజాలం ఎన్నిసార్లు, ఏయే సందర్భాల్లో ప్రస్తావించబడిందో గమనించడమే.

కాన్‌స్టాంటైన్ ఆర్. క్యాంప్‌బెల్, పౌలు మరియు క్రీస్తుతో ఐక్యత: ఒక వ్యాఖ్యాన మరియు దైవశాస్త్ర అధ్యయనం (జొండర్వన్, 2012), 24వ పేజీ, నోట్ 4.

ఈ వ్యాసం మొదట లిగోనియర్ మినిస్ట్రీస్ (Ligonier Ministries) బ్లాగ్‌లో ప్రచురించబడింది.