ఒక క్రైస్తవునిగా నేను పనిచేసే ప్రదేశంలో దేవునికి మహిమకరంగా ఎలా ఉండగలను?

“అలెక్స్, మీకు తెలుసా, ఆదాయ వనరు కావడం పక్కన పెడితే, నా వృత్తిలో నేను చేసే పని అంతా దాదాపుగా అర్థరహితంగా (నిస్సారంగా) అనిపిస్తుంది.” దాదాపు ఇరవై ఏళ్ల వయస్సులో ఉన్నప్పుడు, ఒక విజయవంతమైన క్రైస్తవ వ్యాపారవేత్త తన వృత్తి గురించి నాతో పంచుకున్న మాటలివి. చాలా వినయంగా ఉండే ఆ వ్యక్తి చెప్పదలుచుకున్న విషయం ఏమిటంటే, ఈ లోకంలో పని అనేది తరచుగా తప్పనిసరిగా చేయవలసిన ఒక చెడుగా అనిపిస్తుందని.

నాకంటే వయసులో పెద్దవాడైన ఆ నా స్నేహితుడు తన అస్తిత్వాన్ని (గుర్తింపును) తన పనిలో వెతుక్కోకపోవడం నిజంగా ప్రశంసనీయం – ఎందుకంటే ఇది మనం తప్పించుకోవలసిన ప్రమాదకరమైన ప్రలోభం. అనేకమంది తమ పని నుండి ఆశించే నిజమైన ప్రాధాన్యతను మరియు విలువను కేవలం క్రీస్తు మాత్రమే మనకు అనుగ్రహించగలడు. అయితే, మనం మన ఉద్యోగాలను కేవలం అర్థరహితమైనవిగా మాత్రమే భావించాలా? లేదా, మనం మెలకువగా ఉండే మన జీవితంలో దాదాపు సగం సమయాన్ని వెచ్చించే ఈ దైనందిన కార్యకలాపాల గురించి లేఖనాలు మనకు మరింత సుసంపన్నమైన, ఆశాజనకమైన దృక్పథాన్ని అందించగలవా? క్రైస్తవునిగా పనిచేయడం అంటే దాని నిజమైన అర్థం ఏమిటి?

పని అంటే ఆరాధన

క్రైస్తవులమైన మనం తరచుగా దేవుని పరిచర్యకు సంబంధించిన పనిని లోక సంబంధమైన, లౌకిక పనితో పోల్చి మాట్లాడటం వింటూ ఉంటాం. నిస్సందేహంగా, సంపూర్ణ పరిచర్య అనేది ఎంతో ప్రత్యేకమైన, ప్రాముఖ్యత కలిగిన పిలుపు; అది లేఖనాల్లో చెప్పబడిన విధంగా రెండంతల గౌరవానికి  అర్హమైనది (హెబ్రీయులు 13:7; 1 తిమోతి 5:17). అయితే, ఒక క్రైస్తవునికి, సమస్త జీవితము అంతా “కోరామ్ డియో” (Coram Deo) అంటే, దేవుని సన్నిధిలో (ఆయన ముఖం ఎదుట) జీవించబడాలి. అందుచేత, ఇతరుల శ్రేయస్సు కోసం ఉపయోగపడే మరియు విశ్వాసంలో పాతుకుపోయిన విధేయతతో మన ప్రభువుకు సమర్పించబడే ఏ చిన్న కార్యకలాపమైనా సరే, అది క్రైస్తవ పనియే అవుతుంది.

రోమా 12:1 వచనం మనల్ని దేవునికి, “పరిశుద్ధమును అనుకూలమునైన సజీవ యాగముగా మీ శరీరములను దేవునికి సమర్పించుకొనుడి, ఇదే మీరు చేయవలసిన ఆత్మ సంబంధమైన ఆరాధన” అని  ఆదేశిస్తుంది. ఇది కేవలం ఒక్కసారి చేసి ముగించే కార్యక్రమం కాదు, కానీ నిరంతరము కొనసాగించే ఒక పవిత్రమైన అర్పణ. “జీవించువారిక మీదట తమ కొరకు కాక, తమ నిమిత్తము మృతి పొంది తిరిగి లేచిన వాని కొరకే జీవించుటకు” (2 కొరింథీయులు 5:15) జీవించి, మరణించి, తిరిగి లేచిన ఆ ఒక్కనికే మన జీవితమంతా అంకితం చేయబడాలి. మనం ఈ విధంగా జీవించడం, దేవుని దయను సంపాదించుకోవడానికి కాదు; బదులుగా, మనం ఇప్పటికే ఆయన అపారమైన దయను పొంది, అనుభవించాము గనుకనే ఆయనకు మనల్ని సమర్పించుకుంటాము.

మనం చేసే ప్రతి పనికి ప్రాముఖ్యత ఉంది, ఎందుకంటే మన ప్రతి క్రియ, భావన, మరియు ఉద్దేశం సైతం మనం పిలువబడిన ఆ ఆత్మ సంబంధమైన ఆరాధనలో ఒక భాగమై ఉండాలి. కాబట్టి, మనం మన పని కార్యాలయంలో ఉత్పత్తి చేసే వస్తువులు మరియు అందించే సేవలు, సాక్షాత్తు మన నిజమైన యజమానియైన ప్రభువుకే సమర్పించినట్లుగా ఉండాలి. మనం మనుషుల కోసం కాకుండా, ప్రభువు కోసమే హృదయపూర్వకంగా పని చేయాలి (కొలొస్సయులు 3:23). మన లక్ష్యం, ఈ లోక సంబంధమైన ప్రతిఫలం సంపాదించడం కాదు; బదులుగా, దేవుణ్ణి సంతోషపెట్టడానికే మన పనిలో ఉత్తమమైన నాణ్యతను లక్ష్యంగా పెట్టుకోవాలి.

పొరుగువారి ప్రేమగా పని

మార్టిన్ లూథర్ తరచుగా ఇలా అనేవారు: “దేవునికి మన మంచి పనులు అవసరం లేదు, కానీ మన పొరుగువారికి మాత్రం వాటి అవసరం ఉంది.” మన ఉద్యోగాలు మన పొరుగువారిని ప్రేమించడానికి స్పష్టమైన మార్గాలను అందిస్తాయి. దురదృష్టవశాత్తు, మనం “మంచి పని” అనే పదబంధాన్ని తరచుగా కేవలం జీతభత్యాల సందర్భంలో మాత్రమే ఉపయోగిస్తాం. సరైన ప్రతిఫలం ఉండటంలో ఎలాంటి తప్పు లేదు – ఆర్థిక స్వాతంత్ర్యం మరియు సంతృప్తి అనేవి లేఖనాలలో ప్రోత్సహించబడిన (1 థెస్సలొనీకయులు 4:11-12; 1 తిమోతి 5:8; హెబ్రీయులు 13:5) విషయాలే. అయినప్పటికీ, మనల్ని ముఖ్యంగా లేక ప్రధానంగా ప్రేరేపించేది డబ్బు గానీ లేదా సామాజిక హోదా గానీ కాకూడదు. మరి మనల్ని ఏది ప్రేరేపించాలి? దేవునిపై మరియు పొరుగువారిపై ఉన్న ప్రేమ!

మన పనిలో, మనం ఉపయోగకరంగా ఉండడానికి నిరంతరంగా ప్రయత్నించాలి: అదేమిటంటే, జీవితాలను మెరుగుపరచడానికి, క్రమాన్ని స్థాపించడానికి, మరియు బాధను తగ్గించడానికి కృషి చేయాలి. ఇది ఒక మహత్తరమైన సూత్రంలో భాగం: క్రైస్తవ్యం సమాజానికి ఎప్పుడూ శ్రేయస్సునే అందిస్తుంది. ఇది మనల్ని మెరుగైన భర్తలుగా, భార్యలుగా, తండ్రులుగా, తల్లులుగా, పౌరులుగా మరియు నిబద్ధత కలిగిన ఉద్యోగులుగా తీర్చిదిద్దుతుంది. క్రైస్తవ్యం మనల్ని క్రైస్తవులకు మరియు క్రైస్తవేతరులకు కూడా ఒకే విధంగా ఉపయోగపడేవారిగా మారుస్తుంది. ప్రతి మంచి పనికి మంచి వేతనం ఉండకపోవచ్చు. ప్రతి మంచి పనికి తరచుగా ప్రశంసలు లేదా గుర్తింపు లభించకపోవచ్చు. అయినప్పటికీ, ప్రతి మంచి పని తప్పక ఉపయోగకరమైనదిగా ఉంటుంది.

పని అంటే దైవ పిలుపు

ఇతరుల శ్రేయస్సు కోసం, దేవుని హస్తం మనల్ని ఒక నిర్దిష్టమైన వృత్తికి (పనికి) పిలిచిందని గుర్తించడం, ఆ పని యొక్క వివరాలు లేక పరిస్థితులు ఏమైనప్పటికీ, మన హృదయంలో గొప్ప సంతోషాన్ని మరియు నిజమైన ప్రాధాన్యత యొక్క భావనను స్థాపిస్తుంది. మీ యజమాని కృతజ్ఞత లేనివారా? మీ సహోద్యోగులు ఇబ్బందికరంగా (కష్టంగా) ఉన్నారా? మీ వినియోగదారులను సంతృప్తిపరచడం కష్టంగా ఉందా? అయినప్పటికీ, మీ పని కేవలం ఉద్యోగం కాదు; అది దేవుని నుండి వచ్చిన పవిత్రమైన పిలుపు. మన లక్ష్యం విశ్వసనీయతైతే, దేవుని ఘనత మన గమ్యమైతే, అప్పుడు ఈ లోకంలో ఎదురయ్యే చిరాకులను మరియు విసుగులను సహించడం సులభమవుతుంది. ఈ విషయంలో మన ప్రభువైన యేసుక్రీస్తు మనకు అద్భుతమైన ఆదర్శం: ఆయన దూషించబడినప్పుడు, “న్యాయముగా తీర్పు తీర్చు దేవునికి తన్ను తాను అప్పగించుకొనెను” (1 పేతురు 2:23).

శుభకరంగా, నేటి కాలంలో, అనేక విషయాల్లో, మనకు ఉత్తమంగా సరిపోయే వృత్తిని ఎంచుకోవడానికి మనకు స్వేచ్ఛ ఉంది. ఆచరణాత్మకంగా ఎంతవరకు సాధ్యమైతే, మన తలాంతులు, సహజ స్వభావం, నైపుణ్యాలు మరియు వ్యక్తిగత ప్రాధాన్యతలను గరిష్ఠంగా ఉపయోగించుకునే పనిని మనం అన్వేషించాలి. ఆ విధంగా, మన పని కేవలం శ్రమతో కూడిన భారంగా మిగిలిపోదు, బదులుగా డోరతీ సేయర్స్ (Dorothy Sayers) వివరించినట్లుగా: మనం “ఆత్మ సంబంధమైన, మానసిక మరియు శారీరక సంతృప్తిని పొందే,” మరియు “మనల్ని మనం దేవునికి సమర్పించుకునే మాధ్యమం” అవుతుంది. 

మీరు గనక ఉద్యోగ మార్కెట్లో ఉన్నట్లయితే, మీకు కావలసిన పాత్రను సాధించడానికి అవసరమైన నైపుణ్యాలను మరియు రెజ్యూమ్‌ను సిద్ధం చేసుకునే క్రమంలో దేవుని సంకల్పాన్ని  సంపూర్ణంగా నమ్మండి. మనం మన పనిని ఒక దైవ పిలుపుగా చూడటం ద్వారా, కనీసం ప్రస్తుతానిక, దేవుడే మనల్ని ఈ స్థితికి నియమించాడని తెలుసుకొని, మన ప్రస్తుత పాత్రలో మనం విశ్వసనీయంగా ఉండాలని ఇది స్పష్టంగా గుర్తుచేస్తుంది.

సువార్త ప్రకటనకు పూర్వ తయారీగా పని

మన ఉద్యోగం ద్వారా సాధ్యమయ్యే మంచి పనుల ద్వారా, మనం దేవుని అపారమైన కృపకు సంబంధించిన సువార్తను అలంకరిస్తాము (తీతు 2:9–10). అంటే, మనం ఆ సువార్త సందేశాన్ని ఇతరులకు మరింత ఆకర్షణీయంగా మారుస్తాము. కార్యాలయం మనకు, వేరే ఏ విధంగానూ పరిచయం కాని క్రైస్తవేతరులతో కలసిమెలసి ఉండే అవకాశాన్నిస్తుంది. మన సహోద్యోగుల పట్ల మనం చూపించే దయ, సిలువపై మరియు మన దైనందిన జీవితాలలో క్రీస్తు చేసిన రక్షణ కార్యం గురించి మాట్లాడటానికి అవకాశాలను సృష్టిస్తుంది. మార్గములు తెరుచుకున్నప్పుడు, మనం ప్రేమతో నిండిన సత్యాన్ని ప్రకటిస్తూ, వారికి మారుమనస్సును దయచేయమని దేవుణ్ణి విశ్వాసంతో వేడుకుంటూ, ఇతరులతో సంభాషించాలి.

క్రీస్తు దీనినే ముందుగా ఊహించి, మన వెలుగు మనుషుల యెదుట ప్రకాశింపనివ్వమని మనకు బోధించారు. అప్పుడు వారు మన మంచి పనులను చూసి, పరలోకంలో ఉన్న మన తండ్రిని మహిమపరుస్తారు (మత్తయి 5:16).

పరిశుద్ధీకరణ సాధనంగా పని

చివరికి, మన పని ఎంతవరకు కష్టాన్ని మరియు శ్రమను కలిగి ఉంటుందో – మరియు పతనమైన ఈ లోకంలో, అది ఖచ్చితంగా అలాగే ఉంటుంది – ఆ కష్టమే మన పరిశుద్ధీకరణకు ఒక సాధనం అవుతుంది. ఈ నిజమైన సత్యాన్ని గుర్తుంచుకుని, అనేక రకాలైన శోధనలను మనం ఎదుర్కొన్నప్పుడు, దానిని సంపూర్ణ సంతోషంగా ఎంచవచ్చు. ఎందుకంటే, మన విశ్వాసపు పరీక్ష సహనాన్ని కలుగజేస్తుందని మనకు తెలుసు (యాకోబు 1:2-3). “మనలో ఈ మంచి పనిని ప్రారంభించిన ఆయనే దానిని సంపూర్తి చేయుటకు విశ్వాస్యత కలిగి ఉంటాడని” (ఫిలిప్పీయులకు 1:6) మన ప్రభువుకు మనం కృతజ్ఞతా స్తుతులు చెల్లించాలి.

ప్రియమైన క్రైస్తవుడా, మీరు మీ కార్యాలయంలో చేసే పని కేవలం అర్థరహితమైనది (నిస్సారమైనది) ఎంత మాత్రమూ కాదు! నిజానికి, అది మీ జీవితంలో దేవుని పిలుపులో ఒక అత్యంత ముఖ్యమైన భాగం. అది ఆత్మ సంబంధమైన ఆరాధనను మన ప్రభువుకు సమర్పించడానికి, సామాన్య శ్రేయస్సు కొరకు తోడ్పడటానికి, మరియు మంచి క్రియల ద్వారా మీ పొరుగువారిని ప్రేమించడానికి దేవుడు మీకు ఏర్పాటు చేసిన ఒక పవిత్రమైన వేదిక.

ఈ వ్యాసం క్రైస్తవ శిష్యత్వం యొక్క ప్రాథమిక అంశాలు అనే సేకరణలో భాగం.

ఈ వ్యాసం మొదట లిగోనియర్ మినిస్ట్రీస్ బ్లాగ్‌లో ప్రచురించబడింది.