క్రైస్తవ పరిపక్వత అంటే ఏమిటి?

మా తోటలో ఒక చిన్న ఆపిల్ చెట్టు ఉంది. ప్రతి సంవత్సరం అది కొంచెం పెద్దగా పెరుగుతూ, దాని పండ్లు కూడా కొంచెం ఎక్కువగా కాస్తున్నాయి. సంవత్సరాలు గడిచేకొద్దీ అది పరిపక్వత చెందింది, ఆ పరిపక్వత ఫలాలను పొందడం ఒక ఆశీర్వాదంలా ఉంది.

అనేక విధాలుగా, క్రైస్తవ జీవితం మనల్ని పిలిచే దానికి ఇది ఒక చిత్రం—అదే నిరంతరం పెరుగుతున్న ఫలవంతమైన ఎదుగుదల. కాబట్టి, మనం ఇలా చదువుతాము, “కాబట్టి మనము… సంపూర్ణులమగుటకు సాగిపోదము” (హెబ్రీ. 6:1).

పరిపక్వత యొక్క ఉదాహరణ

క్రైస్తవ పరిపక్వత మనకు ప్రభువైన యేసులో చూపబడింది. ఆయనకు అనుగుణంగా మారడం ద్వారానే మనం పరిపక్వత చెంది ఫలవంతం అవుతాము.

ప్రభువైన యేసు యొక్క మానవ జీవిత వాస్తవికతను తక్కువగా అంచనా వేసే ధోరణి ఉంది. కానీ క్రీస్తు యొక్క జీవితంలో పరిపక్వతలో నిజమైన ఎదుగుదల ఉంది. ఆయన ఒక పరిపూర్ణమైన శిశువు, బాలుడు మరియు వయోజనుడు. ఆయన ఈ దశలన్నింటిలోనూ పాపరహితంగా పరిపక్వత చెందారు.

లూకా 2:40లో మనకు ఇలా చెప్పబడింది: “బాలుడు జ్ఞానముతో నిండుకొనుచు, ఎదిగి బలము పొందుచుండెను; దేవుని దయ ఆయనమీద నుండెను.” కాల్విన్ చెప్పినట్లుగా, “క్రీస్తు నిజమైన మనిషిగా చేయబడ్డాడు… మానవ స్వభావం నుండి విడదీయలేని ప్రతిదాన్ని ఆయన స్వచ్ఛందంగా స్వీకరించాడు.” అందులో పరిపక్వతలో ఎదుగుదల కూడా ఉంది.

తన తండ్రి వలన వాక్యమును బోధించబడడం ద్వారా క్రీస్తు పరిపక్వత చెందాడు:

శిష్యులువినునట్లుగా నేను వినుటకై 

ఆయన ప్రతి యుదయమున 

నాకు విను బుద్ధి పుట్టించుచున్నాడు. (యెషయా 50:4)

పతనమైన లోకంలోని జీవిత శోధనలు మరియు బాధల ద్వారా కూడా ఆయన పరిపక్వత చెందారు. హెబ్రీయులకు రాసిన రచయిత ఇలా అంటున్నాడు, “ఆయన శ్రమలవలన విధేయతను నేర్చుకొనెను.” (హెబ్రీ. 5:8). ప్రతి దశలోనూ యేసు విధేయత పరిపూర్ణంగా ఉంది, కాని ఆయన బాధలు ఆయనను మరింత గొప్ప విధేయత మరియు పరిపక్వత వైపు నడిపించాయి.

పరిపక్వత సాధనాలు

క్రీస్తు పరిపక్వతకు కేవలం ఒక నమూనా మాత్రమే కాదు; ఆయన క్రైస్తవ పరిపక్వతకు సాధనం కూడా. ఫలం చెట్టుతో ఐక్యమైనప్పుడే పెరగగలదు. వాంఫ్రేకు చెందిన జాన్ బ్రౌన్ ఇలా అంటారు,

విశ్వాసము ద్వారా మనము క్రీస్తుతో ఐక్యమై, ఆయనతో ఏకమయ్యే వరకు, మనలోని అవినీతిని అణచివేసి, నూతన స్వభావాన్ని పెంపొందించేందుకు ప్రభువైన యేసు నుండి ఎటువంటి ప్రభావ రసాన్ని స్వీకరించడం జరగదు.

పరిపక్వత “ఆయన యందు” అభివృద్ధి చెందుతుంది.

క్రీస్తు నియమించిన సాధనాలను ఉపయోగించుకోవడం ద్వారా ఈ పరిపక్వత అభివృద్ధి చెందుతుంది. ఎఫెసీయులకు 4వ అధ్యాయంలో పౌలు ఇలా అంటున్నాడు, యేసు సంఘమునకు “కాపరులను మరియు బోధకులను” వరములుగా ఇచ్చాడు, మరియు వీరు మనలను “క్రీస్తు పరిపూర్ణత యొక్క పరిమాణమునకు, పరిపూర్ణ పురుషత్వమునకు” నడిపించడానికి ఇవ్వబడ్డారు (ఎఫె. 4:11, 13). దేవుడు తన సంఘమునకు అనుగ్రహించిన కాపరుల నుండి ప్రయోజనం పొందడం ద్వారా, మనము “మనమిక మీదట పసిపిల్లలమై యుండి, … గాలికి కొట్టుకొనిపోవునట్లు, కల్పింపబడిన ప్రతి ఉపదేశమునకు ఇటు అటు కొట్టుకొనిపోవుచు అలలచేత ఎగురగొట్టబడిన వారమైనట్లుండక… శిరస్సుయైన ఆయనయందు, అనగా క్రీస్తునందు, మనమన్ని విషయములలో ఎదుగుదము.” (ఎఫె. 4:14, 15). వాక్య బోధకు శ్రద్ధ చూపడం సిద్ధాంతపరమైన స్థిరత్వాన్ని తెస్తుంది మరియు తప్పుడు బోధలచేత దారి తప్పిపోకుండా కాపాడుతుంది. అది మన శిరస్సుయైన క్రీస్తు వలె మారడానికి దారితీస్తుంది. ఇదే పరిపక్వత. తమ శ్రోతలలో ఈ పరిపక్వతను చూడటమే ప్రసంగీకుల లక్ష్యం: “ప్రతి మనుష్యుని క్రీస్తునందు సంపూర్ణునిగా చేసి ఆయనయెదుట నిలువబెట్టవలెనని, సమస్తవిధములైన జ్ఞానముతో మేము ప్రతి మనుష్యునికి బుద్ధిచెప్పుచు, ప్రతి మనుష్యునికి బోధించుచు, ఆయనను ప్రకటించుచున్నాము.” (కొలొస్సయులు 1:28).

లోకంలో శ్రమలను అనుభవించడం ద్వారా కూడా క్రీస్తు వంటి పరిపక్వత వస్తుంది. రోమా 5:3–4 ఇలా చెబుతోంది, “శ్రమ ఓర్పును, ఓర్పు పరీక్షను, పరీక్ష నిరీక్షణను కలుగజేయునని యెరిగి శ్రమలయందును అతిశయపడుట.” పతనమైన ఈ లోకంలో జీవితంలోని శోధనలు మరియు కష్టాలు మన క్రీస్తు వంటి స్వభావాన్ని అభివృద్ధి చేస్తాయి.

వాక్య బోధ ద్వారా మనం ఆశీర్వదించబడినప్పుడు, జీవితంలోని శ్రమల ద్వారా మనం పవిత్రపరచబడినప్పుడు, పరిపక్వతలో ఎదుగుదల ఉంటుంది. సామెతలు మనకు ఇలా చెబుతున్నాయి, “జ్ఞానముగలవానికి ఉపదేశము చేయగా వాడు మరింత జ్ఞానము నొందును” (సామెతలు 9:9). శ్రమ యందు “అభ్యాసము కలిగినవారికి అది నీతియను సమాధానకరమైన ఫలమిచ్చును” అని మనకు చెప్పబడింది (హెబ్రీయులు 12:11).

అపరిపక్వతకు ఆధారాలు

పరిపక్వత అంటే క్రీస్తును పోలి ఉండటం. అయితే, పరిపక్వత అంటే ఏమిటో దానికి వ్యతిరేకమైన అపరిపక్వత ద్వారా కూడా మనం చూడవచ్చు. హెబ్రీయులకు 5:12–14లో అపరిపక్వత గురించి విస్తృతమైన వివరణ ఉంది. విశ్వాసులు “దేవోక్తులలో మొదటి మూలపాఠములను” ఎరుగరని, వారికి “బలమైన ఆహారము కాక పాలు” అవసరమని, మరియు వారు “మేలు కీడులను వివేచింపలేరని” మనకు చెప్పబడింది. పాలకు మరియు అపరిపక్వతకు వాటి సమయం మరియు స్థానం ఉన్నాయి (1 పేతురు 2:2; 1 కొరింథీయులకు 13:11). కాని క్రైస్తవులు సిద్ధాంతం గురించి అజ్ఞానులుగా ఉండటానికి గానీ, లేదా మంచి చెడుల విషయంలో నైతిక నిశ్చయత లేకుండా ఉండటానికి గానీ ఉద్దేశించబడలేదు. లేదు, క్రైస్తవ పరిపక్వత ఈ విషయాలకు విరుద్ధమైనది.

అపరిపక్వతకు మరో సూచన 1 కొరింథీయులకు 3:1–3లో వివరించబడింది. పౌలు కొరింథీయులను “క్రీస్తునందు పసిబిడ్డలు” అని సంబోధిస్తూ, “మీలో అసూయయు కలహమును ఉన్నవి” అని అన్నాడు. వ్యక్తుల విషయంలో సంఘంలో ఏర్పడే విభజనలు ఆధ్యాత్మిక అపరిపక్వతను వెల్లడిస్తాయి. దీనికి విరుద్ధంగా, క్రైస్తవ పరిపక్వత అంటే విశ్వాసుల మధ్య ఐక్యతను ప్రేమించడం.

ముగింపు

క్రైస్తవులు ఈ జీవితంలో పరిపూర్ణ పరిపక్వతను ఎప్పటికి పొందలేరు. ఎదుగుదల ఎల్లప్పుడూ అవసరం. మనము “మన ప్రభువును రక్షకుడునైన యేసుక్రీస్తు అనుగ్రహించు కృపయందును జ్ఞానమందును అభివృద్ధి చెందుటకు” (2 పేతురు 3:18) పిలువబడ్డాము. మన పూర్తి పరిపక్వత పరలోకం కోసం వేచి ఉంది. మనము ఆయనను చూచినప్పుడు ఆయన వలె ఉంటాము (1 యోహాను 3:2). ఆ రోజు మాత్రమే పరిపక్వత యొక్క పూర్తి వైభవం మనది. ప్రస్తుతానికి, మనం “ప్రభువుయొక్క మహిమను అద్దమువలె ప్రతిఫలింపజేయుచు, మహిమనుండి అధిక మహిమను పొందుచు ఆ పోలికగానే మార్చబడుచున్నాము” (2 కొరి. 3:18).

మన సంపూర్ణ క్రీస్తుస్వరూప పరిపక్వత దినం నిశ్చయమైనది: “దేవుడెవరిని ముందు ఎరిగెనో, వారు తన కుమారునితో సారూప్యము గలవారవుటకు వారిని ముందుగా నిర్ణయించెను” (రోమా 8:29). మనము క్రీస్తునందు పరిపక్వత పొందుతాము. ఎంత గొప్ప నిరీక్షణ!

ఈ వ్యాసం మొదట లిగోనియర్ మినిస్ట్రీస్ (Ligonier Ministries) బ్లాగ్‌లో ప్రచురించబడింది.