యిర్మీయా గురించి మీరు తెలుసుకోవలసిన 3 విషయాలు

యిర్మీయా గ్రంథం బైబిల్‌లోని అర్థం చేసుకోవడం కష్టతరమైన (లేదా చదవడానికి చాలా కష్టమైన) గ్రంథాలలో ఒకటి. పదాల సంఖ్య పరంగా, ఇది మొత్తం బైబిల్‌లోనే అతి పొడవైనది. ఇది కవితాత్మక చిత్రాలు, కథనాల మధ్య ఎలాంటి ముందస్తు హెచ్చరిక లేకుండానే మారిపోతూ ఉంటుంది. అంతేకాకుండా, ఇది కాలక్రమానుసారం కూడా ఉండదు. దీనిలోని ఎక్కువ భాగం తీవ్రమైన తీర్పు, ఘోరమైన పాపం గురించి వివరిస్తుంది; ఆశ రేకెత్తించే అంశాలు చాలా తక్కువ. అందుకే, ఈ గ్రంథాన్ని చదవడానికి పూనుకున్నప్పుడు చాలామంది అయోమయానికి గురవుతారు.

అయితే, దేవుడు ఈ గ్రంథాన్ని మన ప్రోత్సాహం కోసం ఇచ్చాడు (రోమా 15:4). మనం దీనిని చదువుతున్నప్పుడు మూడు విషయాలను దృష్టిలో ఉంచుకుంటే, ఈ సవాళ్లతో కూడిన గ్రంథాన్ని మనకు ఇవ్వడంలో ఉన్న దేవుని అద్భుతమైన జ్ఞానం మరియు ప్రేమను మనం అర్థం చేసుకోవడం ప్రారంభిస్తాం.

1. యిర్మీయా గ్రంథ ఇతివృత్తం: తీర్పు ద్వారా పునరుద్ధరణ

యిర్మీయా గ్రంథం ఎంత సంక్లిష్టంగా ఉన్నప్పటికీ, ఇది రెండు ప్రాథమిక ఇతివృత్తాలను ప్రధానంగా నొక్కి చెబుతుంది: అవి తీర్పు, పునరుద్ధరణ. ఈ రెండు విషయాలను స్పష్టంగా చూపే కీలక వచనం యిర్మీయా 1:10లో ఉంది: “పెల్లగించుటకును విరుగగొట్టుటకును, నశింపజేయుటకును పడద్రోయుటకును, కట్టుటకును నాటుటకును నేను ఈ దినమున జనముల మీదను రాజ్యముల మీదను నిన్ను నియమించియున్నాను.” ఇందులో మొదటి నాలుగు క్రియలు (పెల్లగించడం, విరుగగొట్టడం, నశింపజేయడం, పడగొట్టడం) తీర్పును సూచిస్తాయి. ఆ తర్వాతి రెండు క్రియలు (కట్టడం, నాటడం) పునరుద్ధరణను సూచిస్తాయి. కాబట్టి, ఈ గ్రంథానికి ప్రధాన ఇతివృత్తం ‘తీర్పు ద్వారా పునరుద్ధరణ’ అనే చెప్పాలి.

యిర్మీయా గ్రంథంలోని తీర్పుకు సంబంధించిన వచనాలు ప్రధానంగా క్రీ.పూ. 586లో బాబిలోనియుల చేతిలో యెరూషలేము పతనాన్ని సూచిస్తాయి. యూదా చేసిన ఘోరమైన పాపానికి ఈ భయంకరమైన సంఘటన న్యాయమైన పరిణామమేనని ప్రభువు నిశ్చయంగా చూపించదలిచాడు. ద్వితీయోపదేశకాండము 28వ అధ్యాయంలో ఉన్న నిబంధన శాపాలను యిర్మీయా పదే పదే ప్రస్తావించడం ద్వారా, తన ప్రజలు తనను మోసం చేసి, త్రోవ తప్పినప్పుడు తాను చేస్తానని చెప్పిన దానికి ప్రభువు నమ్మకంగా ఉన్నాడని తెలుస్తోంది. వాస్తవానికి, ఆయన ఈ తీర్పును అమలు చేయడంలో ఎంతో సహనంతో వ్యవహరించాడు.

యిర్మీయా పరిచర్య కాలంలో, యూదా పతనం తప్పనిసరిగా జరగాల్సిన సంఘటనగా మారింది. ఎంత పశ్చాత్తాపపడినా, ప్రార్థించినా దాన్ని ఆపడం అసాధ్యమైంది. అందుకే ప్రభువు యిర్మీయాను ప్రజల కోసం ప్రార్థించవద్దని ఆజ్ఞాపించాడు (యిర్మీయా 7:16; 11:14). అందువల్ల, యూదా ముందు మిగిలిన ఏకైక మార్గం తీర్పును అంగీకరించడం, మరియు వాగ్దాన దేశం నుండి బహిష్కరించబడటం (యిర్మీయా 21:8–10).

కానీ యిర్మీయా సందేశంలో అత్యంత అద్భుతమైన విషయం ఏమిటంటే, తన ప్రజలపై తీవ్రమైన తీర్పును తెచ్చిన అదే దేవుడైన ప్రభువు, శాప ప్రభావాన్ని తిప్పికొట్టాలని (యిర్మీయా 31:28) మరియు తన ప్రజలను స్వస్థపరచాలని (యిర్మీయా 30:12–17; cf. ద్వితీయోపదేశకాండము 32:39) కూడా ఉద్దేశించాడు. ఆయన కేవలం యూదాను చెర నుండి తిరిగి తీసుకొచ్చి మామూలు స్థితికి తీసుకురావడంతో సరిపెట్టుకోలేదు; దానికంటే ఎంతో గొప్ప కార్యాన్ని చేయబోతున్నాడు. ప్రభువు ఒక కొత్త బహుమతిని ఇవ్వాలనుకుంటున్నాడు: అదే నూతన నిబంధన. ఈ నిబంధన ద్వారా దేవుడు, మొదట బహిష్కరణకు దారితీసిన పాప సమస్యను తానే పరిష్కరిస్తాడు. ప్రభువు తన ధర్మశాస్త్రాన్ని తన ప్రజల హృదయాలపై వ్రాస్తాడు (యిర్మీయా 31:31–34), మరియు వారు విశ్వాసంలో స్థిరంగా నిలబడేందుకు (పట్టుదలతో ఉండేందుకు) సామర్థ్యాన్ని పొందుతారు (యిర్మీయా 32:40). ఇకపై పాపం విజయం సాధించదు, దాని పెత్తనం ఉండదు.

కాబట్టి, యూదా ప్రజలకు వారి చరిత్రలో ఎదురైన ఈ తీవ్రమైన, కీలకమైన ముగింపును అర్థం చేసుకుని, అందులో ఎలా జీవించాలో తెలియజేయడానికి యిర్మీయా గ్రంథం ఇవ్వబడింది. వారి దేశం ప్రతి స్థాయిలో (రాజు, ఆలయం, భూమి, ఒడంబడిక) పెకలించబడినప్పటికీ, ప్రభువుకు విమోచన ఉద్దేశ్యం ఉందని యిర్మీయా స్పష్టంగా వెల్లడిస్తున్నాడు. దేవుడు ఆ నీడలాంటి వరాలను (పాత నిబంధన ఆచారాలు, నిబంధనలు) తొలగించాడు. ఎందుకంటే అవి ఎప్పటికీ గతించిపోని, శాశ్వతమైన మరియు అత్యున్నతమైన బహుమతులకు (నూతన నిబంధన ఆశీర్వాదాలకు) మార్గం సుగమం చేయాలనే ఉద్దేశంతోనే. ఇశ్రాయేలు కథకు అసలైన ముగింపు కోపంలో కాకుండా, కృపలో మరియు మహిమలో ఉండబోతోంది.

2. యిర్మీయా గ్రంథంలో మాట్లాడే వ్యక్తులు కొన్నిసార్లు ఎలాంటి ముందుస్తు సూచన లేకుండానే మారతారు. 

యిర్మీయా గ్రంథంలోని కవితాత్మక విభాగాలను అర్థం చేసుకోవడంలో ప్రజలు తరచుగా ఇబ్బందులు పడతారు. అయితే, ఈ లోతైన భాగాలు ప్రభువు, యిర్మీయా మరియు ప్రజల మధ్య జరిగే సంభాషణలను చిత్రీకరిస్తున్నాయని మనం అర్థం చేసుకున్నప్పుడు అవి అర్థవంతంగా మారడం ప్రారంభిస్తాయి. కొన్నిసార్లు యిర్మీయా ప్రజలను “సీయోను కుమారి” (యిర్మీయా 10:19–20) అనే అలంకారిక చిత్రణను ఉపయోగించి వర్ణిస్తాడు, అక్కడ యెరూషలేము ఒక స్త్రీగా చిత్రించబడుతుంది.1

యిర్మీయా గ్రంథంలోని ఈ నాటకీయ సంభాషణల్లో, వక్తలు తరచుగా ఎలాంటి ముందస్తు సూచన లేకుండానే మారిపోతుంటారు. ఉదాహరణకు, యిర్మీయా 8:18–9:3 వచనాల్లో వక్త ఐదుసార్లు మారతాడు. కాబట్టి మనం వచనంలోని సూచనల ఆధారంగా స్వరంలో మార్పును లేదా మాట్లాడేవారిని గుర్తించడం నేర్చుకోవాలి. “ఈ వాక్యంలో ఎవరు మాట్లాడుతున్నారు?” అని మిమ్మల్ని మీరు ప్రశ్నించుకుంటే, మరియు వక్తలు తరచుగా మారతారని ఊహించుకుంటే, మీరు క్లిష్టమైన వచనాలను సులభంగా అర్థం చేసుకోవచ్చు. ఈ విషయంలో వ్యాఖ్యాన గ్రంథాలు (commentaries) మనకు గొప్ప సహాయంగా నిలుస్తాయి.

3. యిర్మీయా గ్రంథం యేసుక్రీస్తును మరియు ఆయన సంఘాన్ని సూచిస్తుంది.

యిర్మీయా గ్రంథానికి అంతిమ ప్రేరణ కర్తయైన ప్రభువైన యేసు (1 పేతురు 1:11), ఈ గ్రంథం చివరికి తన గురించే అని స్పష్టంగా చెప్పాడు (లూకా 24:25–27). కాబట్టి, యిర్మీయా గ్రంథం యేసును గురించి అయితే, ఆయనతో ఏకమైన సంఘం గురించి కూడా అవుతుంది.

మనం యిర్మీయా గ్రంథాన్ని చదివేటప్పుడు, యేసుతో జీవానిచ్చే అనుభవం కలుగుతుందని ఆశించాలి. అంతేకాకుండా, మనకు జీవాన్నిచ్చే మాటలు కూడా అందులో ఉన్నాయని గ్రహించాలి. ప్రభువైన యేసు దావీదు వంశం నుండి వచ్చిన నీతిమంతుడైన కొమ్మ, ఆయనను “యెహోవా మనకు నీతి” అని పిలుస్తారు (యిర్మీయా 23:5–6). అయితే, ఇదే పేరు సంఘానికి కూడా వర్తింపజేయబడింది (యిర్మీయా 33:16). అంటే, దేవుని నీతి కేవలం ఆయన నిత్య రాజును మాత్రమే కాకుండా, ఆయన ప్రజలను కూడా నింపుతుంది.

యేసు రాకడ గురించిన ఈ ప్రత్యక్ష ప్రవచనాలు కేవలం ఆరంభం మాత్రమే. యూదా మరియు అన్యజనాంగాలపై వచ్చిన తీర్పు, ప్రవక్తలు దీనిని “ప్రభువు దినం”గా పేర్కొంటారు, ఇది చివరిలో రాబోయే అంతిమ తీర్పు దినానికి ఒక చిన్న ముందుచూపు మాత్రమే. ఈ అంతిమ తీర్పు దినాన్ని యేసుక్రీస్తు తన సిలువ మరణం ద్వారా సూచించాడు. ఆయన మరణించే సమయంలో భూమి కంపించడం, ఆకాశం అంధకారమవడం వంటి ఘట్టాలు ‘ప్రభువు దినము’కు సంబంధించిన చిత్రణలే (మత్తయి 27:45, 51). ఈ విధంగా, యిర్మీయా యూదా మరియు జాతులపై ప్రభువు తీర్పు గురించి మాట్లాడినప్పుడు, మనం క్రీస్తు సిలువ ద్వారా వచ్చిన ఆ తీర్పును మరింత బాగా అర్థం చేసుకోగలం. అదే విధంగా, యిర్మీయా 30–33 అధ్యాయాలలో ఉన్న పునరుద్ధరణకు సంబంధించిన గొప్ప వివరణ, దేవుని శాశ్వత రాజ్యాన్ని సూచిస్తుంది. ఇది యేసు పునరుత్థానంలో ప్రారంభమైనప్పటికీ, ఇంకా పూర్తిగా నెరవేరలేదు.

కాబట్టి, యిర్మీయా గ్రంథం మన చరిత్రకు బలమైన సాక్షిగా నిలుస్తుంది. క్రీస్తు తిరిగి వచ్చినప్పుడు, యిర్మీయా ప్రకటించిన తీర్పు దాని తుది నెరవేర్పును చూస్తుంది. పాత సృష్టిపై ఆ తీర్పు నెరవేరిన తర్వాత, యిర్మీయా ప్రవచించిన శాశ్వతమైన పునరుద్ధరణలోకి మనం ప్రవేశిస్తాము. అందువల్ల, యిర్మీయా గ్రంథం ప్రతి కాలంలోని పాఠకులకు ఎంతో ప్రయోజనకరమైనదిగా, ఆశాజనకంగా మిగిలి ఉంది.

1. యిర్మీయా 10:19-21 వచనాలలో సీయోను కుమారి తనపై పడిన విపత్తును గురించి విలపిస్తుంది. మరిన్ని వివరాల కోసం, మాథ్యూ హెచ్. పాటన్ రచించిన “జెరెమియా, జోండర్వాన్ ఎక్సెజిటికల్ కామెంటరీ ఆఫ్ ది ఓల్డ్ టెస్టమెంట్” (గ్రాండ్ రాపిడ్స్: జోండర్వాన్, త్వరలో ప్రచురణకు రానుంది) అనే గ్రంథాన్ని చూడవచ్చు.

ఈ వ్యాసం మొదట లిగోనియర్ మినిస్ట్రీస్ బ్లాగ్‌లో ప్రచురించబడింది.