దానియేలు గురించి మీరు తెలుసుకోవాల్సిన 3 విషయాలు

పాత నిబంధన గ్రంథాల్లో దానియేలు గ్రంథానికి ఒక ప్రత్యేక స్థానం ఉంది. దానిలోని విషయ పరిజ్ఞానం, మరియు ఇశ్రాయేలు పునరుద్ధరణ గురించిన పాత నిబంధన ప్రవచనాలతో పాటు, యేసుక్రీస్తు జీవితం, మరణం, పునరుత్థానం, ఆరోహణంలో ఆ ప్రవచనాల నూతన నిబంధన నెరవేర్పుకు మధ్య ఇది ఒక కీలకమైన వారధిగా నిలుస్తుంది. ఈ గ్రంథం సంక్లిష్టతతో, లోతుతో నిండి ఉంది. దీని గొప్పతనాన్ని క్లుప్తంగా వివరించడం కష్టం. అయినప్పటికీ, ఆధునిక పాఠకులకు ఈ గ్రంథాన్ని అర్థం చేసుకోవడానికి సహాయపడే మూడు ముఖ్యమైన అంశాలు దీనిలో ఉన్నాయి.

1. దానియేలు గ్రంథంలోని ప్రారంభ అధ్యాయాల్లోని కథలు (1–6 అధ్యాయాలు) ఈ గ్రంథంలోని తరువాతి ప్రవచనాలకు (7–12 అధ్యాయాలు) విశ్వసనీయతను, బలమైన పునాదిని అందిస్తాయి.

దానియేలు గ్రంథంలోని ప్రారంభ అధ్యాయాల్లోని కథలు, ఎక్కువగా అరామిక్ భాషలో వ్రాయబడ్డాయి, క్రీ.పూ. 605లో బబులోనులో బంధించబడిన యువ యూదుల తరాన్ని స్పష్టంగా చిత్రీకరిస్తాయి. అక్కడ వారు తమను బంధించిన వారి నుండి భయంకరమైన హింసను ఎదుర్కొంటారు, అయినప్పటికీ, వారు ప్రభువుపై విశ్వాసం ఉంచడం వల్ల ఆయన ద్వారా అద్భుతమైన విజయాలు సాధించారు. దానియేలు మరియు అతని స్నేహితులు షద్రకు, మేషాకు మరియు అబేద్నెగోల గురించిన కథ ఈజిప్టులోని యోసేపు కథతో స్పష్టమైన సాహిత్యపరమైన మరియు భాషాపరమైన సంబంధాలను కలిగి ఉన్నాయని తెలుస్తుంది. ఉదాహరణకు, యోసేపు మరియు దానియేలు ఇద్దరూ ఆకర్షణీయులుగా వర్ణించబడ్డారు (ఆదికాండము 39:6; దానియేలు 1:4). అలాగే, ఈ రెండు కథలలోనూ రాజుల కలల వివరణ ఉంటుంది. ఈ కలలు ఆ రాజులకు ఆందోళన కలిగిస్తాయి మరియు భవిష్యత్తు కోసం దేవుని ప్రణాళికను వెల్లడిస్తాయి. అంతేకాకుండా, వాటిని ఒకదానితో ఒకటి అనుసంధానించడానికి ప్రతి కథలోనూ ఒకే హీబ్రూ పదాలను ఉపయోగించి అనుబంధాన్ని సూచిస్తాయి. యోసేపు లాగే, దానియేలు మరియు అతని స్నేహితులు విదేశీ ఆస్థానంలో సేవ చేస్తున్నప్పుడు దేవుని పిలుపుకు నమ్మకంగా ఉన్నారు మరియు ఫలితంగా, వారు గొప్ప సంపన్న స్థానాలకు హెచ్చించబడ్డారు, మెడలో బంగారు గొలుసును బహుమతిగా పొందారు (ఆది. 41:42; దాని. 5:29).

విపత్తులు, హింసలు ఎదురైనప్పటికీ దానియేలు, అతని మిత్రుల విశ్వాసం దానియేలు ప్రవచనాత్మక సందేశానికి మరింత బలం చేకూర్చింది. మాదీయ-పారసీక సంకీర్ణం చేతిలో బబులోను పతనమైన తర్వాత క్రీ.పూ. 536లో యెరూషలేముకు తిరిగి వచ్చిన వలసరాజ్యాలలోని ఇశ్రాయేలీయులకూ, అలాగే విదేశాల్లో ఉండే వారికి ఇది గొప్ప ప్రేరణనిచ్చింది. దాసత్వం నుండి విముక్తి లభిస్తుందనే దివ్యమైన ఆశను ఈ కథలు పెంపొందించాయి. అయితే, దానియేలు ప్రధానంగా ప్రకటించిన అత్యంత కీలకమైన సందేశం ఏమిటంటే, ఈ విముక్తి వెంటనే జరగదని, దాని పూర్తి నెరవేర్పు ఏడింతల కాలం (70 వారాలు) ఆలస్యం అవుతుందని (దానియేలు 9:24). ఈ ఆలస్యమైన పునరుద్ధరణ గురించిన దానియేలు ప్రాథమిక సందేశం, విశ్వాసాన్ని నిలబెట్టుకోవడానికి అత్యంత ఆవశ్యకమైనది.

2. దానియేలు గ్రంథంలో ప్రకటించబడిన యెరూషలేము పునరుద్ధరణకు వచ్చిన ఏడింతల ఆలస్యం, పాత నిబంధన సంఘటనలకు మరియు యేసుక్రీస్తు పరిచర్య కాలంలోని సంఘటనలకు మధ్య ఒక కీలకమైన వారధిగా నిలుస్తుంది.

మోషే కాలం నుండే, ఇశ్రాయేలుకు ఒక రకమైన జాతీయ బహిష్కరణ, ఆపైన పునరుద్ధరణ జరుగుతుందని సూచింపబడింది (ద్వితీయోపదేశకాండము 28:64–68; 30:1–10). లేవీయకాండము 26 అంతటా, ఇశ్రాయేలు బహిష్కరణకు గురైనప్పుడు పశ్చాత్తాపపడకపోతే, తాను వారిపై శిక్షను ఏడు రెట్లు పొడిగించే అధికారం తనకు ఉందని ప్రభువు మోషేకు స్పష్టంగా చెప్పాడు (లేవీయకాండము 26:18, 21, 24, 28).

యిర్మీయా కాలానికి వచ్చేసరికి, ఇశ్రాయేలుకు విధించబడే దూరవాసం (బహిష్కరణ) అనే శిక్ష కేవలం ఒక సాధ్యమయ్యే పరిణామం నుండి సమీపిస్తున్న విధిగా మారింది. పశ్చాత్తాపపడటానికి వారికిచ్చిన సమయం మించిపోయిందని ప్రవక్త స్పష్టం చేశాడు (యిర్మీయా 19). అంతేకాకుండా, బహిష్కరణ రావడం ఖాయమని, అది డెబ్బై సంవత్సరాలు కొనసాగుతుందని కూడా యిర్మీయా ప్రకటించాడు (యిర్మీయా 25:11; 29:10). దానియేలు ఇలాంటి భాగాలను చదివాడు, అవి దానియేలు 9వ అధ్యాయంలో మనం కనుగొనే పశ్చాత్తాప ప్రార్థనను చేయడానికి అతన్ని ప్రేరేపించాయి. ఇశ్రాయేలు ప్రజలు తమ పాపాల కోసం పశ్చాత్తాపపడి, తమ రక్షకుడైన ప్రభువు వైపు హృదయపూర్వకంగా తిరిగే వరకు బహిష్కరణ ముగియదని దానియేలు తెలుసుకుంటాడు. దానియేలు చేసిన నీతియుక్తమైన ప్రార్థన ఫలితంగా, ప్రభువు తన దూత గాబ్రియేల్‌ను అతని వద్దకు పంపుతాడు. గాబ్రియేల్, చెర (దూరవాసం) ఏడింతలుగా పొడిగించబడిందనే వార్తను దానియేలుకు అందించాడు. అంటే, “యెరూషలేము నిర్జనమైపోవడం” ముగియడానికి డెబ్బై సంవత్సరాలు కాకుండా, డెబ్బై సార్లు ఏడు, అంటే 490 సంవత్సరాలు పడుతుందని గాబ్రియేల్ తెలియజేస్తాడు. దీనిని డెబ్బై వారాల ప్రవచనం అని కూడా అంటారు. ఈ గ్రంథంలోని మిగిలిన భాగాలు, దానియేలు కాలం నుండి దేవుని రాజ్యం రాకడ వరకు జరిగే సంఘటనలను వివరించే అనేక దర్శనాలను అందిస్తాయి.

3. దానియేలు గ్రంథంలోని 7 నుండి 12 అధ్యాయాలలోని దర్శనాలు,మద్యనిబంధన కాలంలో (పాత నిబంధన, కొత్త నిబంధన మధ్య కాలం) ప్రపంచ స్థాయిలో అనేక సంఘటనలు జరుగుతున్నప్పటికీ, దేవుని ప్రజలు ప్రభువు యొక్క పునరుద్ధరణ ప్రణాళికపై నమ్మకం ఉంచాలని మరియు భరోసా కలిగి ఉండాలని ప్రోత్సహిస్తాయి.

దానియేలు గ్రంథం రెండవ భాగంలో (అధ్యాయాలు 7-12) అత్యంత ఆశ్చర్యకరమైన విషయం ఏమిటంటే, పునరుద్ధరణలో మెస్సీయ రాకకు ముందు జరిగే సంఘటనలను గురించిన దర్శనాలు ఎంత నిర్దిష్టంగా మరియు ఉన్నాయో గమనించదగ్గ విషయం. భవిష్యత్తు సంఘటనల క్రమాన్ని ప్రవక్త ఎందుకు ఇంత సూక్ష్మ వివరాలతో వెల్లడిస్తాడు అనేది ఆశ్చర్యంగా ఉంటుంది. ఇతర ప్రవక్తలు భవిష్యత్తు గురించి తమ అంచనాలలో చాలా అస్పష్టంగా మరియు ఊహాజనితంగా ఉన్నప్పటికీ, దానియేలు మాత్రం అత్యంత ఖచ్చితత్వంతో వాటిని వివరించాడు. దానియేలు గ్రంథంలోని ఈ సందేశానికి పునరుద్ధరణకు వచ్చిన ఏడింతల ఆలస్యం కీలకమైన సమాధానంగా నిలుస్తుంది. ప్రవక్త ఈ వివరాలను వివరంగా అందించడం ద్వారా, ప్రపంచ చరిత్రలో సామ్రాజ్యాలు ఒకదాని తర్వాత ఒకటి ఉద్భవించి, పతనమవుతున్నప్పటికీ, నిబంధన సమాజం ప్రభువుపై నమ్మకంగా ఉండాలని ప్రోత్సహిస్తున్నాడు. ప్రభువు ఇప్పటికీ మానవ చరిత్రపై సార్వభౌమాధికారిగా ఉన్నాడు. కాబట్టి, ఆయన ప్రజలు తమ విధుల్లో నమ్మకంగా ఉండాలి మరియు దేవుని నిబంధన ప్రజలుగా వారికి ఉన్న ప్రత్యేకమైన ఆధిక్యతలను ఆస్వాదించాలి. ఈ సమయం అంతటా, వారు తమ రక్షకుడైన ప్రభువుపై నమ్మకం ఉంచాలి, ఒక రోజు ఆయన వారిని తప్పకుండా పునరుద్ధరిస్తాడని  గ్రహించాలి.

చరిత్రలో ఎన్నో ఆటుపోట్లు ఎదురైనప్పటికీ, ఇశ్రాయేలులోని నీతిమంతులైన శేషం నిలబడాల్సిన అవసరం ఉన్నట్లే, నేటి మెస్సీయ అనుచరులైన మనం కూడా దానియేలు ప్రవచనాలలో ఆశను కనుగొనాలి. దేవుని ప్రజలుగా మనకు కూడా కొన్ని విధులు మరియు అధికారాలు ఉన్నాయి. మన రాజు తిరిగి రావడానికి మరియు ఆయన రెండు వేల సంవత్సరాల క్రితం ప్రారంభించిన పునరుద్ధరణ కార్యక్రమం నెరవేర్పు కోసం మనం ఎదురు చూస్తున్నాం (2 పేతురు 3:1–13). మనం ఈ లోకంలో ప్రవాసులుగా లేదా తాత్కాలిక నివాసులుగా పరిగణించబడతాము. మనం వాగ్దానించబడిన మెస్సీయ రాజైన యేసుక్రీస్తును విశ్వసించి, ఆయనకు సాక్ష్యంగా జీవిస్తున్నాము. 

చరిత్రలో ఎన్నో ఆటుపోట్లు ఎదురైనప్పటికీ, ఇశ్రాయేలులోని నీతిమంతులైన శేషం నిలబడినట్లే, నేటి మెస్సీయ అనుచరులైన మనం కూడా దానియేలు ప్రవచనాలలో ఆశను కనుగొనాలి. దేవుని ప్రజలుగా మనకు కూడా కొన్ని విధులు, అధికారాలు ఉన్నాయి. మన రాజు తిరిగి రావడానికి, ఆయన రెండు వేల సంవత్సరాల క్రితం ప్రారంభించిన పునరుద్ధరణ కార్యక్రమం నెరవేరడానికి మనం ఎదురు చూస్తున్నాం (2 పేతురు 3:1–13). మనం ఈ లోకంలో ప్రవాసులుగా, తాత్కాలిక నివాసులుగా పరిగణించబడతాము. మనం వాగ్దానం చేయబడిన మెస్సీయ రాజైన యేసుక్రీస్తును విశ్వసిస్తూ, ఆయనకు సాక్ష్యంగా జీవిస్తున్నాము.

ప్రపంచవ్యాప్తంగా రాజకీయాలు, యుద్ధాలు, మార్పులు జరుగుతున్న తరుణంలోనూ, మనం ఆయనను విశ్వాసపూర్వకంగా సేవిస్తున్న దేవుని ప్రజలమై ఉన్నాము (1 పేతురు 1:1; యాకోబు 1:1 చూడండి). దానియేలు మరియు అతని స్నేహితుల మాదిరిగానే, మనం భౌగోళిక రాజకీయ శక్తుల వడిలో నలిగిపోము. ఎందుకంటే మనం జరిగే ప్రతిదాన్ని స్వేచ్ఛగా, మార్పులేని విధంగా నియమించిన గొప్ప రాజైన దేవునికి సేవచేస్తున్నాం (వెస్ట్‌మినిస్టర్ విశ్వాస ప్రకటన 3.1).

ఈ వ్యాసం “బైబిల్‌లోని ప్రతి గ్రంథం గురించి తెలుసుకోవలసిన మూడు ముఖ్యమైన విషయాలు” అనే శ్రేణిలో భాగంగా ఉంది.

ఈ వ్యాసం మొదట లిగోనియర్ మినిస్ట్రీస్ బ్లాగ్‌లో ప్రచురించబడింది.