మరణంలో క్రైస్తవునికి లభించే ఓదార్పు ఏమిటి?

దేవునికి వ్యతిరేకంగా మనిషి చేసే తిరుగుబాటు వలన కలిగే భయంకరమైన పర్యవసానమే మరణమని దేవుని వాక్యం వివరిస్తుంది. మన మొదటి తల్లిదండ్రులు పాపంలో పడకముందే, మన సృష్టికర్త తన పరిశుద్ధమైన ధర్మశాస్త్రాన్ని అతిక్రమిస్తే కలిగే పర్యవసానం మరణమేనని ఆదామును స్పష్టంగా హెచ్చరించారు: “అయితే మంచి చెడ్డల తెలివినిచ్చు వృక్ష ఫలములను తినకూడదు; నీవు వాటిని తిను దినమున నిశ్చయముగా చచ్చెదవు” (ఆది. 2:17). ఆదాము, హవ్వలు దేవుని ధర్మశాస్త్రాన్ని అతిక్రమించిన తర్వాత ఎలాంటి మరణాన్ని అనుభవించారు?

ఆదాము, హవ్వ మరియు మోసపూరితమైన సర్పంపై తీర్పు తీర్చి, ఆదాము చేసిన మొదటి అతిక్రమం కారణంగా సృష్టి మొత్తాన్ని శపించిన వెంటనే, దేవుడు అతడు జీవవృక్ష ఫలమును తిని “శాశ్వతము జీవించునేమో” (ఆదికాండము 3:22) అని నిమిత్తము, ఏదేను తోటలోనుండి “ఆ మనిషిని వెళ్లగొట్టెను” (ఆదికాండము 3:24). సృష్టించబడిన జీవులైనందున, ఆదాము, హవ్వలకు శారీరక మరణం విధించబడింది, మరియు ఆ శిక్ష యొక్క తక్షణ అమలు, వారి సృష్టికర్త యొక్క జీవమిచ్చే సన్నిధి నుండి వారిని అసహజంగా వేరుచేయడం అనే రూపంలో జరిగింది. అన్ని అసహజ వేర్పాటుల వలె, ఇది కూడా వారిని తీవ్రంగా బాధించింది.

మరణానికి ఒక ముల్లు ఉంది, ఆ ముల్లు పాపం వలన దేవుని నుండి వేరుపడటమే, కానీ సువార్తలో ఓదార్పు ఉంది. రక్షణ యొక్క శుభవార్త ఏమిటంటే, తీర్పు తీర్చి భూమిని శపించిన దేవుడే, మరణకరమైన మోసగాని తలను చితకగొట్టు స్త్రీకి వాగ్దానం చేయబడిన సంతానమైన తన ఏకైక కుమారుడైన క్రీస్తు ద్వారా స్వస్థతను కూడా కలుగజేస్తాడు (ఆది. 3:15). అపొస్తలుడైన పౌలు ఇలా వ్రాశాడు: “మరణపు ముల్లు పాపము; పాపమునకున్న బలము ధర్మశాస్త్రమే. అయినను మన ప్రభువైన యేసుక్రీస్తు మూలముగా మనకు జయము అనుగ్రహించుచున్న దేవునికి స్తోత్రము కలుగును గాక” (1 కొరిం. 15:56–57). క్రీస్తు దేవునికి మరియు మానవునికి మధ్య గొప్ప సమాధానకర్త (కొలొ. 1:20–22) మరియు పాపము, మరణముపై గొప్ప విజేత.

మరణంలో కూడా గొప్ప ఓదార్పు లభిస్తుంది, కానీ అది క్రీస్తు లేకుండా ఎప్పటికీ సాధ్యం కాదు. మనం మరణం గురించి ధ్యానించినప్పుడు, ముఖ్యంగా మరణం ఆసన్నమైనప్పుడు, క్రైస్తవులకు లభించే ఓదార్పుకు సంబంధించిన మూడు కోణాలను బైబిలు శక్తివంతంగా నొక్కి చెబుతుంది.

1. మరణంపై క్రీస్తు సర్వోన్నతుడు.

మొదటగా, క్రీస్తు మరణంపై సర్వోన్నతుడు. యెషయా మరణాన్ని మానవాళి మొత్తాన్ని కప్పివేసే ఊపిరాడకుండా చేసే చీకటి దుప్పటిగా వర్ణిస్తూ ప్రవచించాడు,

సమస్తజనముల ముఖములను కప్పుచున్న ముసుకును 

సమస్త జనములమీద పరచబడిన తెరను 

ఈ పర్వతము మీద ఆయన తీసివేయును . (యెషయా. 25:7)

కానీ క్రీస్తు శ్రేష్ఠుడు:

మరెన్నడును ఉండకుండ మరణమును ఆయన మింగి వేయును. 

ప్రభువైన యెహోవా ప్రతివాని ముఖముమీది బాష్ప బిందువులను తుడిచివేయును 

భూమిమీదనుండి తన జనులనిందను తీసివేయును 

ఈలాగున జరుగునని యెహోవా సెలవిచ్చియున్నాడు.  (యెషయా 25:8)

ఇది దేవుని నుండి వచ్చిన నిశ్చయమైన మాట మరియు ప్రకటన: ఆయన మరణ శక్తిని దుర్బలము చేయడమే కాకుండా, మరణాన్ని శాశ్వతంగా మింగివేస్తాడు, ఇది మనల్ని రెండవ అంశానికి తీసుకువెళుతుంది.

2. క్రీస్తు మానవాళి యొక్క పరాయీకరణ సంక్షోభాన్ని పరిష్కరించాడు.

రెండవదిగా, క్రీస్తు సిలువపై తన రక్తాన్ని అర్పణాత్మకంగా చిందించడం ద్వారా తన ప్రజల నిందను తొలగించాడు. హెబ్రీయులకు రాసిన పుస్తకం ఇలా నమోదు చేస్తుంది,

మనుష్యులొక్కసారే మృతిపొందవలెనని నియమింపబడెను; ఆ తరువాత తీర్పు జరుగును. ఆలాగుననే క్రీస్తుకూడ అనేకుల పాపములను భరించుటకు ఒక్కసారే అర్పింపబడి, తనకొరకు కనిపెట్టుకొని యుండువారి రక్షణ నిమిత్తము పాపములేకుండ రెండవసారి ప్రత్యక్షమగును. (హెబ్రీ. 9:27–28)

క్రీస్తు మానవాళి యొక్క పరాయీకరణ సంక్షోభాన్ని పరిష్కరించారు. అంతేకాక, క్రీస్తు దేవుని న్యాయమైన ఉగ్రతను శాంతింపజేసి, తన రక్తంతో మన పాపాలను కడిగివేయడమే కాకుండా, సిలువపై “మన నిమిత్తము శాపగ్రస్తుడై ధర్మశాస్త్ర శాపము నుండి మనలను విమోచించారు” (గలతీ. 3:13). ఆయన తన రక్తంతో మనలను కొనుగోలు చేసి, మన పాపానికి శిక్షను చెల్లించి, మనలను దేవునికి తన సొంత అమూల్యమైన మరియు విలువైన ఆస్తిగా సమర్పించారు. మనం మన సొంతం కాదు, మరియు మనం ఖచ్చితంగా మరణ శక్తి క్రింద లేము. క్రీస్తులో మనం దేవునికి చెందినవారము.

3. క్రీస్తులో మనము భద్రంగా ఉన్నాము.

మూడవదిగా, దేవుని శక్తి ద్వారా మనము అంధకార రాజ్యము (మరియు మరణము) నుండి మార్చబడి, ఆయన అద్భుతమైన వెలుగులోనికి (మరియు జీవములోనికి) తీసుకురాబడతాము: “ఆయన మనలను అంధకార సంబంధమైన అధికారములో నుండి విడుదలచేసి, తాను ప్రేమించిన తన కుమారునియొక్క రాజ్యనివాసులనుగా చేసెను. ఆ కుమారునియందు మనకు విమోచనము, అనగా పాపక్షమాపణ కలుగుచున్నది” (కొలొస్సయులకు 1:13-14). మరియు ఏదీ—శారీరక మరణం కూడా—మనలను ఆయన చేతిలో నుండి అపహరింపలేడు. యేసు ఇలా అన్నారు:

అయితే మీరు నా గొఱ్ఱెలలో చేరినవారు కారుగనుక మీరు నమ్మరు. నా గొఱ్ఱెలు నా స్వరము వినును, నేను వాటి నెరుగుదును, అవి నన్ను వెంబడించును. నేను వాటికి నిత్యజీవము నిచ్చుచున్నాను గనుక అవి ఎన్నటికిని నశింపవు, ఎవడును వాటిని నా చేతిలోనుండి అపహరింపడు. వాటిని నాకిచ్చిన నా తండ్రి అందరికంటె గొప్పవాడు గనుక నా తండ్రి చేతిలోనుండి యెవడును వాటిని అపహరింపలేడు; (యోహాను 10:26–29).

జీవితంలోనూ, మరణంలోనూ మనం క్రీస్తునందు భద్రంగా ఉన్నాము.

ముగింపు

మరణంలో చాలా మర్మము ఉంది, మరియు మనం నిత్యత్వంలోకి వెళ్ళే సమయం వచ్చినప్పుడు ఏమి అనుభవిస్తామో అనే దాని గురించి ఇప్పుడు మనకున్న అస్పష్టమైన భావనలు కలవరపెట్టవచ్చు. ఒక రచయిత హృదయవిదారకంగా ఇలా ప్రతిబింబించారు: “మరణం యొక్క గొప్ప మర్మము, అది జీవితంలోని చిన్న చిన్న మర్మాలను, అవి ఎంత గందరగోళంగా ఉన్నాయో, ఎలా మింగివేస్తుందో! పాఠకులారా, ఆ సంకుచిత గడియలో మనం వాటన్నింటిని స్పృశిస్తాము; ఆ తర్వాత సింహాసనం యొక్క వెలుగులో గొప్ప ప్రత్యక్షత వస్తుంది.”1 కానీ క్రైస్తవునికి, ఓదార్పునిచ్చే వాగ్దానం ఏమిటంటే, మరణం తర్వాత మన కోసం వేచి ఉన్నది దేవుని జీవమిచ్చే సన్నిధిలో నిత్య ఆశీర్వాదమే, ఆయన “నీ కుడిచేతిలో నిత్యము సుఖములుకలవు.” (కీర్తనలు 16:11).

ఈ వ్యాసం మొదట లిగోనియర్ మినిస్ట్రీస్ (Ligonier Ministries) బ్లాగ్‌లో ప్రచురించబడింది.