“సోలస్ క్రిస్టస్” అంటే ఏమిటి?

సంస్కరణ సమయంలో “సోలస్ క్రిస్టస్” యొక్క సిద్ధాంతం ప్రముఖంగా వెలుగులోకి వచ్చింది, సంస్కర్తలు క్రీస్తుపై నీడ వేస్తున్న ఒక సంఘం యొక్క సమస్యను గుర్తించారు; క్రీస్తుకు మాత్రమే చెందిన ప్రత్యేక అధికారాలను తమకు తాము ఆపాదించుకుంటున్న ఒక సంఘం యొక్క సమస్యను వారు గుర్తించారు. ఈ సమస్య సంస్కరణవాదులకు మన రక్షణలో క్రీస్తు ఆధిపత్యం యొక్క సంపూర్ణ ప్రకాశాన్ని మసకబార్చే ఏదైనా ప్రక్షాళన చేయవలసిన అవసరాన్ని ప్రేరేపించింది. సంస్కరణవాదులు ఈ సమస్యను స్పష్టంగా గుర్తించారు మరియు మన కాలానికి కూడా అన్వయించదగిన బైబిలు మరియు వేదాంతపరమైన  పరిష్కారాన్ని అందించారు.

పదహారవ శతాబ్దం ప్రారంభంలో, పశ్చిమ ఐరోపాలో సంఘం ప్రజల జీవితాల కేంద్రంగా ఉండేది. గత శతాబ్దాలలో, రోమన్ కాథలిక్ సంఘం “రక్షింపబడిన వారి సమాజం” నుండి “రక్షణ సంస్థ”గా దిగజారిపోయింది.

“రక్షణ సంస్థ” అంటే ఏమిటి? లూథర్ తన కాలంలో ప్రజలు రోమన్ కాథలిక్ సంఘం యొక్క మతకర్మ వ్యవస్థకు బానిసలుగా మారారని  మరియు దేవుని ముందు తమ స్థానం కోసం క్రీస్తు వైపు చూడటానికి బదులు వారు సంఘం వైపు చూశారని గుర్తించాడు. క్రీస్తు, మరియ మరియు పరిశుద్ధుల కారణంగా కాథలిక్ సంఘంలో దయ యొక్క నిల్వ ఉందని భావించారు. పూజారులు దాని ఏకైక పంపిణీదారులు మరియు విశ్వాసులు వారి వద్దకు రావాల్సి ఉండేది.

1520లో, లూథర్ “ది బాబిలోనియన్ క్యాప్టివిటీ ఆఫ్ ది చర్చ్(సంఘం యొక్క బబులోనియన్ బంధకత్వం)” అనే గ్రంథాన్ని వ్రాశాడు. అందులో అతను సంఘం యొక్క మతకర్మ వ్యవస్థపై దాడి చేశాడు. ఆ వ్యవస్థ, లూథర్ చెప్పినట్లు, ఒక బంధకత్వాన్ని సూచిస్తుంది, అది తన సొంత బబులోన్‌గా మారి, దేవుని ప్రజలను పుట్టినప్పటి నుండి చనిపోయే వరకు బంధించింది: సంఘంలో ఒక వ్యక్తి శిశువుగా బాప్తిస్మం పొందాడు, యువకునిగా ధృవీకరించబడ్డాడు, పరిణతి చెందిన వ్యక్తిగా వివాహం చేసుకున్నాడు మరియు మరణశయ్యపై అంతిమ అభిషేకం పొందాడు.

ఈ మతకర్మలలో ప్రతి ఒక్కటి, పట్టాభిషేకం తో పాటు, ఒక పూజారి ద్వారా నిర్వహించబడినప్పుడు కృపను అందిస్తుందని భావించేవారు. ఒకరి జీవితాంతం ఇవ్వబడిన కృపకు మరో రెండు మతకర్మలు అనుబంధంగా ఉన్నాయి: పూజారితో పాపాలను క్రమం తప్పకుండా ఒప్పుకోవడం మరియు పూజారి చేసే మాస్ ద్వారా యూకారిస్ట్ను స్వీకరించడం.

పుట్టినప్పటి నుండి చనిపోయే వరకు, క్రైస్తవుడు కాథలిక్ సంఘంపై ఆధారపడి ఉన్నాడు, రక్షణ పొందడానికి అవసరమైన  కృపను స్వీకరించడానికి మతకర్మలకు కట్టుబడి ఉన్నాడు.

లూథర్ లేఖనాలను పరిశీలించి కేవలం రెండు మతకర్మలను మాత్రమే చూశాడు. అతని బోధన యొక్క ప్రభావం కాథలిక్ సంఘం మరియు దాని మతాధికారుల నుండి దృష్టిని క్రీస్తు వైపుకు మార్చడం—దయ యొక్క కుళాయిలను తిప్పే పూజారులు కలిగిన సంస్థ నుండి రక్షణ కాదు, కానీ ఒకే వ్యక్తిలో రక్షణ: దేవుని కుమారుడైన యేసు క్రీస్తు.

ఈ అలంకరించబడిన మతకర్మ తొలగించబడిన తరువాత, దయ కోసం ఎక్కడికి వెళ్ళాలి అని ఒకరు అడగవచ్చు? కాథలిక్ సంఘం చాలా తప్పుగా ఉంటే, విశ్వాసులు ఏమి చేయాలి? లూథర్ వంటి సంస్కర్తలు వారిని ఎక్కడికి నిర్దేశిస్తారు?

విట్టెన్‌బర్గ్‌లోని సిటీ సంఘ భవనంలో (స్టాడ్‌కిర్చే) లూథర్ యొక్క ప్రసిద్ధ చిత్రం ఉంది, అందులో అతను బోధించే వేదికపై నిలబడి ప్రకటిస్తున్నాడు. అతను తన చూపుడు వేలును పైకి ఎత్తి, సిలువపై ఉన్న క్రీస్తును చూపిస్తున్నాడు. విశ్వాసులు క్రీస్తును మాత్రమే చూడాలి.

లూథర్ “సిలువ మాత్రమే మన వేదాంతశాస్త్రం” అని చెప్పినప్పుడు, అది మొత్తం రోమన్ కాథలిక్ వ్యవస్థకు ఒక అవమానం: “సోలస్ క్రిస్టస్” సంఘంలో సంస్కరణ యొక్క మొత్తం కార్యక్రమాన్ని నడిపించింది, మానవ నిర్మిత సంప్రదాయం యొక్క కాలుష్యాన్ని తుడిచివేసింది.

ఆ విధంగా, లూథర్ మరియు ఇతర సంస్కర్తలు, దేవుని ముందు మనం ఎలా నీతిమంతులుగా తీర్చబడతామనే దాని గురించి హానికరమైన బోధనల యొక్క ప్రభావాలను సరిదిద్దడానికి ప్రయత్నిస్తూ, పేరుకుపోయిన సంప్రదాయాలను తొలగించి, క్రీస్తుపై మరియు మన విశ్వాసానికి ఆయన వ్యక్తిత్వం మరియు పని ఎలా కేంద్రంగా ఉన్నాయో దానిపై దృష్టి పెట్టారు.

బలమైన రక్షకుడి పరిష్కారం

బలమైన సంఘం యొక్క సమస్యకు సంస్కర్తల సమాధానం అధికారిక లేఖనాలలో కనిపించే బలమైన రక్షకుడు. 

1 యోహాను 1:1-4 చూడండి:

జీవవాక్యమునుగూర్చినది, ఆదినుండి ఏది యుండెనో, మేమేది వింటిమో, కన్నులార ఏది చూచితిమో, ఏది నిదానించి కనుగొంటిమో, మా చేతులు దేనిని తాకి చూచెనో, అది మీకు తెలియజేయుచున్నాము. ఆ జీవము ప్రత్యక్షమాయెను; తండ్రియొద్ద ఉండి మాకు ప్రత్యక్షమైన ఆ నిత్యజీవమును మేము చూచి, ఆ జీవమునుగూర్చి సాక్ష్యమిచ్చుచు, దానిని మీకు తెలియ పరచుచున్నాము. మాతోకూడ మీకును సహవాసము కలుగునట్లు మేము చూచినదానిని వినినదానిని మీకును తెలియజేయుచున్నాము. మన సహవాసమైతే తండ్రితోకూడను ఆయన కుమారుడైన యేసుక్రీస్తుతో కూడను ఉన్నది. మన సంతోషము పరిపూర్ణమవుటకై మేమీ సంగతులను వ్రాయుచున్నాము.

ఒకవైపు, సంస్కర్తలకు వారి కాలంలోని రోమన్ కాథలిక్ సంఘంలో క్రీస్తు శాస్త్రపరమైన విభేదాలు లేవు. అంటే, యేసు క్రీస్తు ఒకే వ్యక్తిలో రెండు స్వభావాలు కలిగి ఉన్నాడు: నిజమైన దేవుడు మరియు నిజమైన మానవుడు అనేది సంస్కర్తలు తమ స్వంత బోధనలో ముందుకు తీసుకువెళ్లిన క్రీస్తు శాస్త్రం.

యోహాను చెప్పినట్లు, ఈ కుమారుడు నిత్యత్వం నుండి తండ్రితో ఉన్నాడు, కానీ మన చేతులతో కూడా తాకబడ్డాడు: ఒకే కుమారుడు, దైవిక మరియు మానవ స్వభావాలు రెండూ కలిగినవాడు. అయితే, ఈ అందమైన క్రీస్తును కొత్తగా ప్రదర్శించాల్సిన అవసరం ఉంది, తద్వారా ఆయన మరియు ఆయన మాత్రమే మన రక్షణకు మూలం మరియు సారాంశం అని ప్రజలు చూడగలరు.

సంస్కర్తలు తమ బోధన మరియు రచనలలో తమ కుంచెను తీసుకుని, రక్షణ యొక్క మొత్తం చిత్రాన్ని క్రీస్తుతో తప్ప మరేమీ లేకుండా నింపినట్లుగా ఉంది. రోమన్ కాథలిక్ సంఘం మరియు దాని పూజారులు ఆ చిత్రానికి ఏదో కలుపుతున్నట్లు చూపించడానికి అతి చిన్న కుంచె యొక్క చలనమైనా అనుమతించబడలేదు, ఎందుకంటే అలా చేయడం రక్షణ యొక్క చిత్రాన్ని కలుషితం చేస్తుంది.

అయితే, సంస్కర్తలు తమ క్రీస్తు యొక్క చిత్రాన్ని నింపడానికి ఎక్కడికి వెళ్లారు? ప్రతి “సోలా” మొదటి సోలాపై ఆధారపడి ఉంటుంది: “సోలా స్క్రిప్టురా” (లేఖనం మాత్రమే). క్రీస్తు యొక్క చిత్రాన్ని పొందడానికి మనం వెళ్ళే స్థలం లేఖనం మాత్రమే. 

అందువల్ల, వారు 1 యోహాను వంటి స్థలాలకు వెళ్లారు, ఆ పుస్తకం క్రీస్తు యొక్క చిత్రంతో ప్రారంభమై విగ్రహాలకు దూరంగా ఉండమని హెచ్చరికతో ముగిసిందని తెలుసుకున్నారు. వారు కొలొస్సయులు 2:9కి వెళ్లారు: “ఏలయనగా దేవత్వము యొక్క సర్వపరిపూర్ణత శరీరముగా క్రీస్తునందు నివసించు చున్నది;” దేవుని యొక్క సంపూర్ణ అవతారమైన కుమారుడు: ఒకే వ్యక్తిలో నిజమైన దేవుడు మరియు నిజమైన మానవుడు మన రక్షణకు ఏకైక నిరీక్షణ. తన సంపూర్ణ బలంతో ఆయన మనలను రక్షించాలి, తన శక్తివంతమైన మధ్యవర్తిత్వంతో అగాధాన్ని పూరించాలి. క్రీస్తులో పరిపూర్ణ మానవత్వం మాత్రమే కాదు, “దేవత్వము యొక్కసర్వపరిపూర్ణత ” కూడా ఉంది. సంస్కరణ సువార్త దీనికి ఆధారం, మన రక్షణ యొక్క సంపూర్ణత కోసం యేసు క్రీస్తులో ఉన్న సమస్తాన్ని ప్రకటించడం.

సిలువ యొక్క వేదాంతశాస్త్రం

మన నిర్జీవ క్రియలు లేదా తప్పుడు మధ్యవర్తుల ద్వారా రక్షణ యొక్క చిత్రానికి మనం ఏదైనా జోడిస్తే, అప్పుడు మనం లూథర్ “సిలువ యొక్క వేదాంతశాస్త్రం” కాకుండా “మహిమ యొక్క వేదాంతశాస్త్రం” అని పిలిచే దానిని ప్రకటిస్తాము తద్వారా మన బలమైన రక్షకునిగా క్రీస్తు యొక్క మహిమను దోచుకుంటాము.

ఈ రోజు కూడా ఇది సంఘానికి ఒక శోదనేన? ఇది మధ్యయుగపు చివరి రోమన్ కాథలిక్ సంఘం కంటే భిన్నమైన రూపాలను తీసుకోవచ్చు, కానీ ఖచ్చితంగా ఇది అలానే ఉంది.

మనకు వాక్యంలో ఇవ్వబడిన రక్షణ యొక్క స్వచ్ఛమైన చిత్రాన్ని కలుషితం చేసే “మహిమ యొక్క వేదాంతశాస్త్రాన్ని” అనుసరించడానికి మనం ఎల్లప్పుడూ శోదించబడతాము. మహిమ యొక్క వేదాంతశాస్త్రం దేవుణ్ణి కోరుకుంటుంది కానీ సిలువను దాటవేస్తుంది, తద్వారా దేవుడిని చేరుకోవడంలో మానవ పరికరాలను చొప్పిస్తుంది. దేవునితో మన సంబంధాన్ని క్రీస్తు తప్ప మరెవరూ మధ్యవర్తిత్వం చేయలేరనే వాస్తవాన్ని మనపై ఒత్తిడి తీసుకురావడానికి సోలస్ క్రిస్టస్ పదహారవ శతాబ్దంలో అవసరమయ్యింది మరియు ఇరవై ఒకటవ శతాబ్దంలో అవసరం.

ఈ వ్యాసం వాట్ ఆర్ ది ఫైవ్ సోలాస్? సేకరణలో భాగం.