క్రైస్తవ జీవితం కొరకు ఒక తీర్మానం

ఈ నూతన సంవత్సర సందర్భాన్ని పురస్కరించుకుని, అపొస్తలుడైన పౌలు రాసిన పత్రికలలోని ఒక ప్రాముఖ్యమైన వాక్యాన్ని మనం ధ్యానిద్దాం. ఈ లేఖన భాగం మీకు ఇప్పటికే బాగా తెలిసి ఉండవచ్చు, కొందరికైతే కంఠస్థం కూడా వచ్చి ఉండవచ్చు. ఒకవేళ ఇది మీకు కొత్తదైనా సరే, దీనిని మీరు సులభంగా గుర్తుంచుకోగలరు. ఫిలిప్పీయులకు రాసిన పత్రిక 3:10-14లో పౌలు తన వ్యక్తిగత తీర్మానాన్ని ఈ విధంగా తెలియజేస్తున్నాడు:

ఏ విధముచేతనైనను మృతులలో నుండి నాకు పునరుత్థానము కలుగవలెనని, ఆయన మరణ విషయములో సమానానుభవముగలవాడనై, ఆయనను ఆయన పునరుత్థాన బలమును ఎరుగు నిమిత్తమును, ఆయన శ్రమలలో పాలివాడనగుట యెట్టిదో యెరుగు నిమిత్తమును, సమస్తమును నష్టపరచుకొని వాటిని పెంటతో సమానముగా ఎంచుకొనుచున్నాను.

 ఇది వరకే నేను గెలిచితిననియైనను, ఇదివరకే సంపూర్ణ సిద్ధి పొందితిననియైనను నేను అనుకొనుట లేదు గాని, నేను దేని నిమిత్తము క్రీస్తు యేసుచేత పట్టబడితినో దానిని పట్టుకొనవలెనని పరుగెత్తుచున్నాను. సహోదరులారా, నేనిదివరకే పట్టుకొని యున్నానని తలంచుకొనను. అయితే ఒకటి చేయుచున్నాను; వెనుక ఉన్నవి మరచి ముందున్న వాటికొరకై వేగిరపడుచు క్రీస్తు యేసునందు దేవుని ఉన్నతమైన పిలుపునకు కలుగు బహుమానమును పొందవలెనని, గురి యొద్దకే పరుగెత్తుచున్నాను. 

ఫిలిప్పీ పత్రిక ఆరంభంలోనే, తన యౌవన సహచరుడైన తిమోతి తనతోనే ఉన్నట్లు పౌలు పేర్కొన్నాడు. పౌలు తన పత్రికలను తరచుగా ఇతరులకు చెబుతూ రాయించేవాడు (Dictation); బహుశా ఈ పత్రికకు తిమోతి లేఖరిగా (Secretary) సేవలు అందించి ఉంటాడన్న ఉద్దేశంతోనే పౌలు ఆయన పేరును ప్రస్తావించాడేమోనని నాకు అనిపిస్తుంటుంది. ఈ పత్రిక “పౌలును తిమోతియును” అనే వందన వాక్యాలతోనే మొదలవుతుంది. తన ఆత్మీయ కుమారుడైన తిమోతితో “నీ పేరు కూడా ఇక్కడ చేర్చుకో” అని చెబుతున్నప్పుడు, పౌలు ముఖంలో ఒక చిన్న చిరునవ్వు మెరిసి ఉంటుందని నేననుకుంటుంటాను.

ఒకవేళ అదే నిజమైతే, పౌలు ఈ భాగానికి వచ్చి, “అయితే నేను చేసేది ఒక్కటే” అని చెబుతున్నప్పుడు, తిమోతి ఖచ్చితంగా ఆశ్చర్యంతో పౌలు వైపు చూసి ఉంటాడని నాకనిపిస్తుంది. తను చెప్పింది తిమోతికి అర్థం కాలేదా అని పౌలు అడిగి ఉంటే, బహుశా ఆయన ఇలా బదులిచ్చే ధైర్యం చేసి ఉండవచ్చు: పౌలు గారూ, మీరు కేవలం ఒక్క పని మాత్రమే చేస్తారని నేను నిజంగా రాయమంటారా? నాకు తెలిసినప్పటి నుండి మీరు ఎప్పుడూ ఎన్నో పనులను ఒకేసారి చేస్తూనే ఉన్నారు. మీరు అసాధారణమైన ప్రతిభ గల అపొస్తలులు. మీరు నిరంతరం ప్రయాణాలు చేస్తూనే ఉంటారు; వాక్యాన్ని ప్రకటిస్తారు; ప్రార్థనలో గడుపుతారు; విశ్వాసులను పరామర్శిస్తూ వారికి ఆత్మీయ సలహాలు ఇస్తుంటారు. మీరు కేవలం ఒక్క పనికే పరిమితం అవ్వడం నేనెప్పుడూ చూడలేదు.

పౌలు తన యౌవన స్నేహితుడైన తిమోతి వైపు చిరునవ్వుతో చూస్తూ ఇలా అని ఉంటాడని నాకనిపిస్తోంది: “తిమోతి, నీవు ఏ ఉద్దేశంతో అంటున్నావో నాకు అర్థమైంది. నేను చేసే పనుల గురించి, నేను ఎన్ని రకాల పనులలో నిమగ్నమై ఉంటానో నీకంటే బాగా ఎవరికి తెలుసు? కానీ నీవు ఒక ముఖ్యమైన విషయం గ్రహించాలి. నేను వేర్వేరు పనుల్లో మునిగి తేలడం లేదు; నేను చేసేవన్నీ కలిపి ఒకే ఒక్క పనిని రకరకాల మార్గాల్లో చేస్తున్నాను. వాటన్నిటి వెనుక ఉన్న ఏకైక లక్ష్యం ఏమిటంటే ప్రభువైన యేసుక్రీస్తును మరింత లోతుగా ఎరగడం, ఆయన జీవంలో పాలుపొందడం మరియు ఆయన పోలికలోకి మారడం. నేను మేల్కొన్న ప్రతి క్షణం, నేను చేసే ప్రతి పని వెనుక ఉన్న అసలు ఉద్దేశం ఇదే. నా జీవిత పరమార్థం, నా రహస్యం కూడా ఇదే. అవన్నీ ఆ ఒక్క లక్ష్యాన్ని చేరుకోవడానికి నేను ఎంచుకున్న భిన్నమైన మార్గాలు మాత్రమే.

నేను స్కాట్లాండ్‌లో చిన్నపిల్లాడిగా ఉన్నప్పుడు, ప్రతి నూతన సంవత్సర వేడుకల సమయంలో (అక్కడ దీనిని ‘హోగ్మనే’ అంటారు), మా తల్లిదండ్రులు నన్ను గదిలోకి వెళ్లి వచ్చే ఏడాది కోసం పది తీర్మానాలు రాసుకోమని చెప్పేవారు. వెనక్కి తిరిగి చూసుకుంటే, నన్ను నేను దిద్దుకోవాల్సిన పది విషయాలను వెతకడం అప్పట్లో నాకు ఎంత కష్టంగా అనిపించిందో తలచుకుంటే ఇప్పుడు నవ్వొస్తుంది. బహుశా, ఆ పది తీర్మానాలను రాయడం ఇప్పుడు నాకు చాలా సులభం అనిపిస్తోంది.

కానీ మీరు ఒక క్రైస్తవులైతే, మీకు నిజంగా అవసరమైనది ఒకే ఒక్క నూతన సంవత్సర తీర్మానం; దానికి పౌలు చేసిన తీర్మానం మీకు ఎంతో సహాయకరంగా ఉంటుంది. ముఖ్యంగా మీరు యౌవన దశలో ఉన్న వారైతే, మీ జీవితాన్ని సరళంగా, క్రమబద్ధంగా మార్చుకోవడానికి దీనికంటే మించిన మార్గం మరొకటి లేదని మీరు గ్రహించాలి. ఇదే మీ జీవితానికి ఒక స్పష్టమైన దిశానిర్దేశాన్ని ఇస్తుంది. “అసలు నేను ఈ భూమి మీద ఎందుకు ఉన్నాను?” లేదా “నా జీవిత పరమార్థం ఏమిటి?” అనే లోతైన ప్రశ్నలకు సమాధానం కనుగొనడానికి ఇది మీకు ఎంతగానో సహాయపడుతుంది.

ఒక ప్రాచీన అనువాదంలో ఈ వాక్యం ఇలా వ్రాయబడింది:

“నా ఏకైక ఆశయం క్రీస్తును ఎరగడమే! ఆయన పునరుత్థాన శక్తిని అనుభవించడం, ఆయన శ్రమలలో పాలుపొందుతూ ఆయన మరణం విషయంలో ఆయనతో ఏకరూపము పొందడమే నా తపన. తద్వారా నేనూ మృతులలో నుండి పునరుత్థానాన్ని పొందుతానని ఆశిస్తున్నాను.” (ఫిలిప్పీ 3:10-14).

ఇది ఎంతటి ఉన్నతమైన నూతన సంవత్సర తీర్మానం! “నేను చేసేది ఒక్కటే: నేను క్రీస్తును ఎరగాలని ఆశపడుతున్నాను.”

ఈ వ్యాసం మొదట లిగోనియర్ మినిస్ట్రీస్ (Ligonier Ministries) బ్లాగ్‌లో ప్రచురించబడింది.