గర్భస్రావం కలిగించే అపరాధభావం నుండి విముక్తి

గర్భస్రావానికి సంబంధించిన అపరాధభావంతో వేలాది మంది ప్రజలు తీవ్ర వేదన అనుభవిస్తున్నారు. గర్భస్రావం చేయించుకున్న స్త్రీలే కాక, అందుకు కారణమైన పురుషులను, ఆ ప్రక్రియను నిర్వహించే వైద్యులను కూడా ఈ నేరభావం నిరంతరం వెంటాడుతోంది. ఒక వైద్యురాలు ‘ది న్యూయార్క్ టైమ్స్’ పత్రికతో మాట్లాడుతూ, గర్భస్రావం చేయడానికి ముందు తాను మానసిక సంఘర్షణకు లోనయ్యేదాన్నని, ఎన్నో రాత్రులు నిద్రలేకుండా గడిపేదాన్నని పేర్కొన్నారు.  “ఒక గైనకాలజిస్ట్‌కు ఇది చాలా కష్టమైన పని,” అని ఆమె అన్నారు. “దీనివల్ల కలిగే భావోద్వేగాలు ఎంత బలంగా ఉంటాయంటే… వైద్యులు వీటి గురించి ఒకరితో ఒకరు కూడా చెప్పుకోలేరు.” ఒక సందర్భంలో, గర్భస్రావం చేసిన తర్వాత ఆ వైద్యురాలు తీవ్రమైన మనస్తాపానికి గురై అక్కడే నేలపై కుప్పకూలిపోయారు.

అపరాధభావం అనేది చాలా బలమైన మానసిక వేదన; ఇది మనిషిని లోలోపల కుంగదీసి, వారి ఆలోచనా శక్తిని స్తంభింపజేస్తుంది (Psychological paralysis). ఒకసారి ఒక మనోవైద్యుడు తన బృందంలో చేరమని నన్ను కోరాడు. తన దగ్గరకు వచ్చే రోగులలో చాలామంది తీవ్రమైన అపరాధభావంతో సతమతమవుతున్నారని ఆయన వివరించాడు. ఆయన నాతో ఇలా అన్నారు: “ఈ ప్రజలకు కావాల్సింది వైద్యుడు కాదు, ఒక ఆధ్యాత్మిక గురువు (యాజకుడు). తమకు క్షమాపణ లభించిందని భరోసా ఇచ్చే ఒక వ్యక్తి వారికి ఎంతో అవసరం.”

ఈ మనోవైద్యునికి క్రైస్తవ్యంపై ప్రత్యేకమైన మక్కువ ఏమీ లేదు; ఆయనకు తన రోగుల మానసిక ఆరోగ్యంపై మాత్రమే శ్రద్ధ ఉండేది. పరిష్కారం దొరకని అపరాధభావం మనిషిని ఎంతలా కుంగదీస్తుందో ఆయనకు బాగా తెలుసు. ఒకవేళ ఆ అపరాధభావం నిజమైనదైతే, దానిని లేదని అబద్ధం చెప్పుకోవడం ద్వారా గానీ, లేదా సమర్థించుకోవడం ద్వారా గానీ పోగొట్టుకోలేమని ఆయన గుర్తించాడు. నిజమైన అపరాధభావానికి ఉన్న ఏకైక పరిష్కారం ‘నిజమైన క్షమాపణ’ మాత్రమే. మన చేతులకు అంటిన మరకను కడుక్కోవడానికి బదులు, దానిని కేవలం కప్పిపుచ్చడానికి ప్రయత్నించడం వల్ల ఎటువంటి ప్రయోజనం ఉండదు.

దేవుని క్షమాపణను అనుభవించడం

క్షమాపణ ద్వారా లభించే సంపూర్ణ విముక్తిని పొందాలంటే, ఒక వ్యక్తి వినయంతో, నలిగిన హృదయంతో దేవుని సన్నిధికి వెళ్లి తన పాపాన్ని ఒప్పుకోవాలి. ‘నలిగిన హృదయం’ అంటే దేవుని ఆజ్ఞను అతిక్రమించినందుకు కలిగే యథార్థమైన పశ్చాత్తాపం. ఇది కేవలం ‘శిక్షకు భయపడి పడే వేదన’ కంటే భిన్నమైనది. దొరికిపోతామనే భయంతోనో, శిక్ష పడుతుందనే ఆందోళనతోనో చూపించే పశ్చాత్తాపం నిజమైనది కాదు. ఉదాహరణకు, ఒక బిడ్డ దొంగతనంగా తినుబండారాల పాత్రలో చేయి పెట్టి పట్టుబడినప్పుడు, తల్లి చేతిలోని బెత్తాన్ని చూసి భయపడటం కేవలం ‘శిక్షాభీతి’ మాత్రమే. అది తాను చేసిన తప్పు పట్ల కలిగిన బాధ కాదు, పట్టుబడినందుకు కలిగిన భయం. కానీ నిజమైన పశ్చాత్తాపం తన తప్పును నిజాయితీగా అంగీకరిస్తుంది తప్ప, దానిని సమర్థించుకోవడానికి ప్రయత్నించదు. ఎవరైతే పూర్ణ హృదయంతో, ఇకపై ఆ పాపం చేయకూడదనే దృఢ నిశ్చయంతో దేవునిని ఆశ్రయిస్తారో, వారు నిశ్చయంగా దేవుని క్షమాపణ పొందుకుంటారు.

నేను చేసిన తప్పును తిరిగి మార్చలేకపోయినా, నాకు క్షమాపణ మాత్రం లభిస్తుంది. దేవుని కృపలోని అద్భుతాలలో క్షమాపణ ఒకటి; దాని స్వస్థపరిచే శక్తి ఎంతో గొప్పది. ఒకవేళ ఏ స్త్రీ అయినా గర్భస్రావంలో పాలుపంచుకుని ఉంటే, ఆమె తన జీవితాంతం ఒక నేరస్తురాలిగా ముద్ర వేయించుకుని తిరగాలని దేవుడు కోరడు. ఆమె తన పాపం విషయమై పశ్చాత్తాపపడి, క్షమాపణ ద్వారా లభించే పవిత్రత కోసం తన యొద్దకు రావాలని ఆయన ఆశిస్తున్నాడు. దేవుడు మనల్ని క్షమించినప్పుడు, మనం నిజంగా క్షమించబడతాము. ఆయన మనల్ని పవిత్రపరిచినప్పుడు, మనం నిజంగా పవిత్రులమవుతాము. నిశ్చయంగా, ఇది మనం ఎంతో సంతోషించదగ్గ విషయం!

ఈ వ్యాసం మొదట లిగోనియర్ మినిస్ట్రీస్ (Ligonier Ministries) బ్లాగ్‌లో ప్రచురించబడింది.