యేసు మనకు మాదిరియా?

క్రీస్తుకూడ మీకొరకు బాధపడి, మీరు తన అడుగుజాడలయందు నడుచుకొనునట్లు మీకు మాదిరి యుంచిపోయెను. (1 పేతురు 2:21)

ఒక రకంగా చెప్పాలంటే, దీనికి సమాధానం చాలా సులభం. యేసు మనకు మాదిరియా? అవును. యేసు మనకు మాదిరియే, కానీ ఆయన కేవలం మనకు మాదిరి మాత్రమే కాదు; అలాగే ఆయనను అనుకరించడం అనేది మన విశ్వాసానికి పునాది కాదు.

క్రీస్తు యొక్క విశిష్టమైన విమోచన కార్యం

యేసు మనకు “ఆయన అడుగుజాడలను అనుసరించుటకు ఒక మాదిరిని” విడిచిపెట్టాడని వ్రాయడానికి ముందు, పేతురు మొదటగా “క్రీస్తు మీ కొరకు శ్రమపడ్డాడు” అని నొక్కిచెప్పాడు—అంటే, మనం ఇతరుల పక్షాన శ్రమపడని రీతిలో. యేసు సిలువపై శ్రమపడినప్పుడు, ఆయన “మన పాపములను తన శరీరమందు భరించెను”; మన కొరకు ఆయన గాయపరచబడుట ద్వారా మన గాయములను స్వస్థపరచెను (1 పేతురు 2:24). గొర్రెలవలె దారితప్పిన వారము మనమే, మరియు మన కొరకు ఆయన చేసిన ఆ విశిష్టమైన కార్యము  మనము పరిశుద్ధతతో జీవించునట్లు మన పాపము నుండి మనలను విమోచించింది (1 పేతురు 2:25).

మనకోసము చేసుకోలేని పనిని లేదా ఇతరుల కోసము చేయలేని పనిని, యేసు తన జీవము, మరణము మరియు పునరుత్థానము ద్వారా—విశ్వాసం ద్వారా ఆయనతో అనుసంధానించబడిన—మన కోసము ఆ పనిని చేశారు; ఆ పనిని మనం మన కోసమో లేదా ఇతరుల కోసమో చేయలేము. తోటి పాపులను వారి పాపం యొక్క శాశ్వత పరిణామాల నుండి విడిపించడానికి మనం మరణించలేము. కానీ సాక్షాత్తు దేవుడిగా మరియు పరిపూర్ణ మానవుడిగా ఉన్న యేసు, సిలువపై పాపులకు బదులుగా తనను తాను అర్పించుకున్నారు. తనను విశ్వసించే మన కోసం క్రీస్తు శ్రమను అనుభవించారు.

నాలుగు సువార్తల ముగింపు ఘట్టంలో, మనకు మనమే చేసుకోలేని పనిని యేసు మన కోసం చేయడం కనిపిస్తుంది. సువార్తల యొక్క మొదటి మరియు ప్రధాన ఉద్దేశ్యం యేసు చేసిన పనులను అనుకరించడం కాదు, కాని యోహాను చాలా స్పష్టంగా రాసినట్లుగా, యేసును విశ్వసించడమే: “యేసు దేవుని కుమారుడైన క్రీస్తు అని మీరు నమ్మునట్లును, నమ్మి ఆయన నామమందు జీవము పొందునట్లును ఇవి వ్రాయబడెను.” (యోహాను 20:31).

క్రీస్తు శిష్యులుగా ఆయనను అనుకరించడం

ఓ, యేసు అడుగుజాడలను అనుసరించడానికి సువార్తలు ఎంత గొప్పవి! ఆయన సాధించిన విజయ సారం అనుపమానమైనది, అయినప్పటికీ ఆయన మానవ జీవితం, మాటలు మరియు కార్యాలు అద్భుతమైన అనుకరణీయతతో నిండి ఉన్నాయి. పాపుల వ్యతిరేకతకు మరియు ఈ పతనమైన లోకపు గమనానికి వ్యతిరేకంగా, మానవ శరీర రక్తాలతో జీవిస్తూ తన తండ్రిని మహిమపరచడానికి ప్రయత్నిస్తున్నా  ఆయన నిజంగా, మనవలె,  మానవుడు. యేసు మన పాపాలకు ఏకైక ప్రాయశ్చిత్తం (అనుచితం) మరియు క్రైస్తవ జీవితానికి మన సార్వత్రిక ఉదాహరణ కూడా.

యేసు స్వయంగా తన అనుచరులను తన నుండి నేర్చుకోమని, తన అడుగుజాడల్లో నడవమని పిలిచారు. మత్తయి 11:29లో ఆయన, “నా కాడిని [సులభమైన మరియు తేలికైన దానిని] మీ మీద వేసుకొని, నా నుండి నేర్చుకోండి” అని చెప్పారు. వాస్తవానికి, యేసు యొక్క “శిష్యుడు”గా ఉండటం అంటే ఇదే—’శిష్యుడు’ అంటే నేర్చుకునేవాడు అని అర్థం. ఆయన జీవితం మరియు బోధనల నుండి నేర్చుకుంటూ, ఆయన మాదిరిని అనుసరించేవారే ఆయన శిష్యులు. కాబట్టి, యేసు తాను మరణించడానికి ముందు రాత్రి తన శిష్యుల పాదాలను కడిగినప్పుడు ఇలా అన్నారు: “కాబట్టి ప్రభువును బోధకుడనైన నేను మీ పాదములు కడిగిన యెడల మీరును ఒకరి పాదములను ఒకరు కడుగవలసినదే. నేను మీకు చేసిన ప్రకారము మీరును చేయవలెనని మీకు మాదిరిగా ఈలాగు చేసితిని.” (యోహాను 13:14–15).

క్రీస్తు జీవ మరణము యొక్క విమోచన యోగ్యతను మనం పునఃసృష్టించలేకపోయినప్పటికీ, ఆయన నడుముకు తువాలు కట్టుకొని ఉన్నప్పుడు గానీ, లేదా ఆయన శరీరం సిలువకు మేకులతో కొట్టబడి ఉన్నప్పుడు గానీ, ఆయన ప్రదర్శించిన స్వీయ-వినయ, స్వీయ-త్యాగ ప్రేమను మనం అనుకరించగలము—నిజానికి, మనం అనుకరిస్తాము.

యేసును మనకు మాదిరిగా ఉంచుకోవాలని అపొస్తలులు కూడా మనల్ని ప్రోత్సహిస్తున్నారు. పౌలు ఇలా అంటాడు: “క్రీస్తు యేసులో మీకు కలిగిన ఈ మనస్సునే మీరునూ కలిగియుండుడి; ఆయన…” — ఆ తర్వాత ఆయన, యేసు తనను తాను తగ్గించుకున్న విధానాన్ని, అలాగే సిలువ మరియు పునరుత్థానాల ద్వారా లభించిన మహిమను వివరిస్తాడు (ఫిలిప్పీయులకు 2:5–8). అలాగే, యోహాను తన మొదటి పత్రికలో ఇలా రాశాడు: “ఆయనయందు [యేసుయందు] నిలిచియున్నవాడనని చెప్పుకొనువాడు ఆయన ఏలాగు నడుచుకొనెనో ఆలాగే తానును నడుచుకొన బద్ధుడైయున్నాడు” — అంటే, స్వీయ-త్యాగ మరియు దేవుణ్ణి మహిమపరిచే ప్రేమ మార్గంలో నడవాలి (1 యోహాను 2:6).

లోననివసించే క్రీస్తు ఆత్మ యొక్క శక్తి

అయితే, క్రైస్తవులమైన మనం “దైవభక్తిగల జీవితాలను” జీవించడం అంటే ఏమిటి? పౌలు దీనిని 1 తిమోతి 3:16లో ప్రత్యేకంగా గుర్తుండిపోయే పదాలలో తెలియజేశాడు, అక్కడ ఆయన ఇలా వ్రాశాడు, “నిరాక్షేపముగా దైవభక్తిని గూర్చిన మర్మము గొప్పదైయున్నది.” అవును, దైవభక్తి. ఇందులో ఏమేమి ఉండవచ్చు? మనం సద్గుణాల లేదా నీతి కార్యాల యొక్క త్వరిత జాబితాను ఆశించవచ్చు. దానికి బదులుగా, దైవభక్తిగల క్రైస్తవ జీవితానికి దైవమానవుడైన యేసు మాదిరి యొక్క ప్రాముఖ్యతను పౌలు నొక్కిచెప్పాడు. మనకు యేసు గురించిన ఒక కీర్తన లభిస్తుంది:

ఆయన సశరీరుడుగా ప్రత్యక్షుడయ్యెను.
ఆత్మవిషయమున నీతిపరుడని తీర్పునొందెను 
దేవదూతలకు కనబడెను 
రక్షకుడని జనములలో ప్రకటింపబడెను 
లోకమందు నమ్మబడెను 
ఆరోహణుడై తేజోమయుడయ్యెను.

దైవభక్తి అంటే ఏమిటో మీరు తెలుసుకోవాలనుకుంటున్నారా? యేసు వైపు చూడండి. ఆయనే సాక్షాత్ దైవభక్తి స్వరూపం. అందుకే, క్రైస్తవులు దైవికమైన అనురాగాలను, క్రియలను తరచుగా “క్రీస్తును పోలి ఉండటం” అని పిలుస్తారు. మన విశ్వాసానికి మూలం ఆయన సాటిలేని విమోచన కార్యం, మరియు క్రైస్తవ జీవనానికి అత్యున్నత ఉదాహరణ ఆయన అద్భుతంగా అనుకరించదగిన మానవ జీవితమే.

మనం సువార్తలను చదివి, ఆయన కార్యాలను చూసి ఆశ్చర్యపోతాము. పాపుల కొరకు ఆయన చేసిన సాటిలేని కార్యాన్ని చూసి మనం భక్తితో నిలబడతాము, మరియు ఆయన సంభాషించడం, ప్రార్థించడం, బోధించడం, కరుణ చూపడం, విశ్రాంతి కోసం ఏకాంతంగా వెళ్ళడం, కృపతో పరిచర్య చేయడానికి తిరిగి రావడం మనం చూస్తాము. మనం ఆయన ప్రేమను, ఆయన సహనాన్ని, ఆయన జ్ఞానాన్ని గమనిస్తాము, మరియు మనలో నివసించే ఆయన ఆత్మ శక్తి ద్వారా, ఆయన అడుగుజాడలను అనుసరించడానికి ప్రయత్నిస్తాము.

ఈ వ్యాసం మొదట లిగోనియర్ మినిస్ట్రీస్ (Ligonier Ministries) బ్లాగ్‌లో ప్రచురించబడింది.