తిరుగుబాటు చేస్తున్న నా బిడ్డతో నేను ఎలా వ్యవహరించాలి?

యుక్తవయస్కులైన లేదా యువ్వనంలో ఉన్న తమ బిడ్డలతో సంబంధాలు విచ్ఛిన్నం కావడం అనేది తల్లిదండ్రుల జీవితమంతటిపైనా ఒక తీవ్రమైన చీకటిని కమ్ముకుంటుంది. వాస్తవానికి, సంతోషంతో, ఉల్లాసంతో నిండిపోవలసిన కుటుంబ వేడుకలు సైతం, తీరని నష్టాన్ని గుర్తుచేసే బాధాకరమైన సందర్భాలుగా మారిపోతాయి. హృదయాలు చెదిరిపోయి, గందరగోళానికి గురైన, మరియు దిక్కుతోచని స్థితిలో ఉన్న తల్లిదండ్రులకు ఏ వైపు తిరగాలో తెలియని దుస్థితి ఏర్పడుతుంది.

తల్లిదండ్రులకు, పిల్లలకు మధ్య విచ్ఛిన్నమైన సంబంధాలకు ఎన్నో కారణాలు చూపవచ్చు. అయితే, విచ్ఛిన్నమైన ప్రతి సంబంధంలోనూ అంతర్లీనంగా ఉన్న మూల అంశం ఇది ఒక్కటే: మనం పాపం చేస్తాము, మరియు మనకు వ్యతిరేకంగా పాపం చేయబడుతుంది. అత్యంత జాగ్రత్తగల, శ్రద్ధగల తల్లిదండ్రులు సైతం ఈ సత్యం నుండి తప్పించుకోలేరు. మరి ఈ విచ్ఛిన్నతను దాటి, పునఃసమాధానము (Reconciliation) వైపు తల్లిదండ్రులు ఎలా చేరుకోగలరు? తరచుగా మనల్ని వేధించే ఈ బాధాకరమైన ప్రశ్నకు దేవుని వాక్యమైన బైబిలు స్పష్టంగా సమాధానం ఇస్తుంది.

పునఃసమాధానము యొక్క లక్షణాలు మరియు విషయాలతో దైవ లేఖనాలు నిండి ఉన్నాయి. ఇది కేవలం ఒక రోజులో జరిగే సంఘటన కాదు, ఇది జీవితకాలం సాగే ఆత్మీయ ప్రయాణం, ఒక ప్రక్రియ. పాపము మరియు తిరుగుబాటు కారణంగా విచ్ఛిన్నమైన, యుక్తవయస్కులైన లేదా పెద్దవారైన పిల్లలతో ఉన్న సంబంధాలను చక్కదిద్దుకోవడానికి, దేవుని వాక్యం అందిస్తున్న కొన్ని విలువైన సలహాలను ఇప్పుడు మనం పరిశీలిద్దాం.

1. దేవుని ఉద్దేశాలను గుర్తుంచుకోండి.

మీ యుక్తవయస్కులైన (టీనేజ్) లేదా వయోజనులైన బిడ్డల విషయంలో మీ ప్రయత్నాలన్నీ విఫలమయ్యాయని తీర్మానించుకునే బదులు, దయచేసి దేవుని వాగ్దానాలను దృఢంగా గుర్తుంచుకుని, విశ్వాసంతో ఓర్పు వహించండి. తల్లిదండ్రులుగా మన జీవితంలో దేవుని ప్రాథమిక ఉద్దేశం ఏమిటో గమనించండి. ఆయన మనల్ని క్రీస్తు స్వరూపంలోనికి మారుస్తున్నాడు. మనకు సంభవించే శ్రమల ద్వారా (అవి మనం చేసిన తప్పుల వలన కలిగినా, లేక ఇతరుల వల్ల లేదా జీవిత పరిస్థితుల వల్ల మనపై మోపబడినా), ఆయన మనల్ని పరిశుద్ధపరచడానికి, శుద్ధి చేయడానికి ఎల్లప్పుడూ పనిచేస్తున్నాడు. గుర్తుంచుకోండి: మీ శ్రమ ఎన్నడూ వృథా పోదు. మీరు ఒక పవిత్రమైన ప్రయాణంలో ఉన్నారు, మరియు మన దేవుడు నమ్మకమైన పరలోకపు తండ్రి. ‘వదిలేయడం’ అనే ఆలోచన, మీరు దేవుని ఆత్మ కార్యంలో కాకుండా, మీ సొంత మానవ ప్రయత్నాలపై నిరీక్షిస్తున్నారని సూచిస్తుంది. పిల్లలతో విచ్ఛిన్నమైన సంబంధాల వల్ల కలిగే తీవ్రమైన గుండె నొప్పినీ, నష్టాన్నీ నేను విస్మరించడం లేదు, అయితే నిరాశ అనేది తరచుగా అవిశ్వాసాన్ని ప్రతిబింబిస్తుంది. మన ప్రయత్నాలు కాదు, దేవుని ఆత్మ మాత్రమే నిజమైన మార్పును తీసుకొస్తాడని గట్టిగా విశ్వసించండి.

బైబిలు బోధించే పునఃసమాధానము (Reconciliation) తప్పనిసరిగా మన సొంత హృదయాలలోనే మొదలవ్వాలి. దేవుని ఆత్మ మన అంతరంగానికి అంతర్దృష్టినీ, రూపాంతరాన్నీ ఎలా తీసుకొస్తుందో అనేదానిపైనే మనం ప్రధానంగా దృష్టి పెట్టాలి. ఈ సంబంధాల విచ్ఛిన్నానికి మనం ఏ విధంగా దోహదపడ్డాము అనేదానిపై మనకు స్పష్టమైన అంతర్దృష్టి అవసరం. నేను దీనిని తిరుగుబాటును నిరాయుధీకరణ చేయడం అని పిలుస్తాను. మనం పునఃసమాధానాన్ని కోరుతూ ముందడుగు వేసినప్పుడు, మన యువకులు లేదా పెద్దవారైన పిల్లలు మనపై వారికి న్యాయబద్ధమైన కారణం ఉందని భావించే తలంపును తొలగించడానికి ప్రయత్నించాలి. వినయమే  పునఃసమాధానానికి మూల ఆధారం. పునఃసమాధానం అనేది మీ పిల్లల ఆధ్యాత్మిక క్షేమం గురించే ఉండాలి. “నా తిరుగుబాటు బిడ్డను నేను ఎలా బాగుచేయాలి?” అని ఆలోచించకండి. బదులుగా, “దేవుడు నన్ను క్రీస్తు స్వరూపంలోనికి మార్చడానికి వ్యక్తులను, పరిస్థితులను ఎలా ఉపయోగిస్తున్నాడు?” అని ఆలోచించండి. పునఃసమాధానం అనేది మీకు మంచి అనుభూతిని కలిగించడానికి, మీ భారాన్ని దించుకోవడానికి, మీ జీవితాన్ని ముందుకు నడిపించడానికి, మిమ్మల్ని మీరు సమర్థించుకోవడానికి లేదా మీ మనస్సాక్షిని శుభ్రం చేసుకోవడానికి మాత్రమే కాదు. ఈ శ్రమను ఆలింగనం చేసుకోండి, ఎందుకంటే ఇది మిమ్మల్ని దేవుని సన్నిధికి చేరుస్తుంది. మీరు క్రీస్తుపై దృష్టి పెట్టడం అనేది ఆయన అత్యున్నత సంకల్పం. శుద్ధి చేసే అగ్ని రూపాంతరకరమైనది; అది స్వచ్ఛమైన బంగారాన్ని ఉత్పత్తి చేస్తుంది.

2. ప్రార్థన అనేది పునఃసమాధానమునకు ప్రాథమిక ఆధారం.

వినయం కొరకు విజ్ఞాపన చేయండి. ఈ సంబంధం విచ్ఛిన్నం కావడంలో మీరు ఏ విధంగా భాగమయ్యారో అందుకు దేవుని సంపూర్ణ క్షమాపణ కొరకు ప్రార్థించండి. మీ జీవిత భాగస్వామి కొరకు మరియు మీ బిడ్డ కొరకు ప్రార్థించండి; సాధ్యమైతే వారితో కలిసి ప్రార్థించండి. మీరు శాంతిని స్థాపించే హృదయాన్ని కలిగి ఉండాలని, శ్రద్ధగా వినే మనస్సును ఇవ్వాలని దేవుని వేడుకోండి. మీరు భయానికి లొంగిపోకుండా ఉండాలని ప్రార్థించండి. మీరు క్రీస్తులో ప్రేమించబడిన విధంగానే, మీ బిడ్డను కూడా ప్రేమించగలిగే కృప కొరకు ప్రార్థించండి. మీరు జీవాన్ని ప్రసాదించే సువార్త సందేశంతో మీ బిడ్డల ప్రపంచంలోకి ప్రవేశించాలని ఆశపడుతున్నారు. వినయము మరియు ప్రార్థన ఈ రెండూ మీ యుక్తవయస్కులైన లేదా వయోజనులైన బిడ్డలతో తిరుగుబాటును నిరాయుధీకరణ చేసే సంభాషణలకు మిమ్మల్ని సమాయత్తం చేస్తాయి. 

ముందున్న గొప్ప అవకాశాల గురించి ఆలోచించండి. మీరు కొన్ని కఠినమైన అడ్డంకులను లేదా సవాళ్లను ఎదుర్కోవలసి రావచ్చు. అయితే, మీ బిడ్డలు మీ మాటల్లోనూ, మీ వైఖరిలోనూ దేవుని వైపు నుండి వచ్చిన స్థిరమైన నిశ్చయాన్ని  చూసినట్లయితే, అది తప్పకుండా స్వస్థతను ప్రోత్సహిస్తుంది. క్రీస్తు మిమ్మల్ని ఏ విధంగా షరతులు లేకుండా ప్రేమించారో, అదే విధంగా మీరు వారిని ప్రేమించాలనే మీ హృదయపూర్వకమైన ఆకాంక్షను వారికి తెలియజేయడానికి దృఢంగా నిశ్చయించుకోండి.

పిల్లలు తమ తల్లిదండ్రుల పట్ల విశ్వాసంతోనూ, ప్రేమతోనూ జీవించడం మంచిది. కుటుంబం అంతా క్రీస్తు రాజ్యంలో కలిసి సేవ చేయడం ఎంతటి మనోహరమైన విషయం! తరతరాలుగా దేవుని మార్గాలలో నడవడం అనేది ఎంతో విలువైంది మరియు అమూల్యమైనది. అయితే, ఈ ఆశీర్వాదాలు ‘తప్పక’ మనకు ఉండాల్సిందే అని మనం భావించినప్పుడు, లేదా దేవునిలో ఎలాంటి ఓదార్పు గానీ, నిరీక్షణ గానీ దొరకనంతగా మనం తీవ్రమైన నిస్సత్తువతోనూ, నిరాశతోనూ ఉన్నప్పుడు, మనం ప్రమాదంలో ఉన్నాము. అప్పుడు, ఆశీర్వాదాలనే మనం ఆరాధించడం ప్రారంభిస్తాము.

దేవుడు మనలను సంబంధాల కొరకే సృష్టించాడు. దేవునితో మనకున్న సంబంధము మరియు ఇతరులతో మనకున్న సంబంధాలు, ఈ రెండూ త్రిత్వంలో  నిత్యము ఉన్న ప్రేమ, సహవాసం, మరియు సంకల్పం అనే పరిపూర్ణ సంబంధం యొక్క నమూనాగా ఏర్పడ్డాయి. సహజంగానే, దేవుని యొక్క కేంద్ర మానవ సంబంధ వలయమైన కుటుంబంలో విచ్ఛిన్నమైన సంబంధాలను మనం అనుభవించినప్పుడు, మన హృదయాలు తీవ్రమైన వేదనతో నిండిపోతాయి. అయినప్పటికీ, దేవునికి స్తోత్రము! ఆయనే పునఃసమాధానమునకు కావలసిన మార్గాన్ని సృష్టించాడు. మన పరలోకపు తండ్రితో మనల్ని సమాధానపరచడానికి, ప్రభువైన యేసుక్రీస్తు యొక్క జననం, పవిత్ర జీవితం, శిలువ మరణం మరియు మహిమగల పునరుత్థానంలోనే ఈ పునఃసమాధానం అత్యంత శక్తివంతంగా నమూనాగా మరియు వాస్తవంగా చూపబడింది.

3.  వినయముతో కూడిన ప్రేమను కనపరచండి.

మనం నిజమైన మరియు వినయపూర్వకమైన క్రైస్తవ విశ్వాసంతో నిత్యం జీవించడం కొనసాగించాలి. దేవుడు మిమ్మల్ని ఏ విధంగా ప్రేమించాడో, అదే విధంగా ప్రేమించండి. క్రీస్తు మీకు చూపిన దివ్య సౌందర్యం, అనంతమైన కృప, లోతైన కరుణ మరియు సంపూర్ణ అవగాహనతో మీ సంబంధ అంచనాలను చుట్టుముట్టండి. తండ్రి యెదుట క్రీస్తు మీ కోసం విజ్ఞాపన చేస్తూనే ఉన్నాడు. కాబట్టి, ప్రమాదంలో ఉన్న ప్రతి ఒక్కరికీ క్రీస్తు అందించే అదే దయగల ఆహ్వానాన్ని మీ తిరుగుబాటు బిడ్డ మీలో చూడాలి, మరియు మీ మాటలలో వినాలి.

మీరు నిరాశకు లోనయ్యే అవకాశం ఉన్నప్పుడు, ధైర్యం కోల్పోకండి. మత్తయి 11:28-30 వచనాలలో ప్రయాసపడి, భారము మోయుచున్న వారికి క్రీస్తు ఇచ్చిన ప్రేమపూర్వకమైన పిలుపును గుర్తుంచుకోండి. ఈ పిలుపు కేవలం పాపులను ఆహ్వానించడమే కాక, విశ్వాసులకు నిత్యమైన ఆశ్రయాన్ని కూడా వాగ్దానం చేస్తుంది.

విచ్ఛిన్నమైన సంబంధాలలో మన భాగస్వామ్యాన్ని ఒప్పుకోవడానికి మనల్ని మనం వినయపరచుకోవడం చాలా కష్టమైన పని. తల్లిదండ్రులుగా మనం చేసిన న్యాయమైన, గౌరవప్రదమైన త్యాగాన్ని, మన మంచి ఉద్దేశాలను, మరియు మన నిజాయితీ ప్రయత్నాలను సమర్థించుకోకుండా, కేవలం పశ్చాత్తాపపడటం మరింత కష్టం. తిరుగుబాటును క్రీస్తు స్వభావంతో ఎదుర్కోవడం అంత సులభం కాదు. మరి ఈ తిరుగుబాటును నిరాయుధీకరణ చేసే సేవను మనం ఎలా నెరవేర్చగలము? మనకు మార్గదర్శకత్వం మరియు ప్రోత్సాహం కోసం అపొస్తలుడైన పేతురు ఒక సమయానుకూలమైన జ్ఞాపికను అందిస్తున్నాడు:తన మహిమనుబట్టియు, గుణాతిశయమునుబట్టియు, మనలను పిలిచినవాని గూర్చిన అనుభవజ్ఞాన మూలముగా ఆయన దైవశక్తి, జీవమునకును భక్తికిని కావలసిన వాటినన్నిటిని మనకు దయచేయుచున్నందున, దేవుని గూర్చినట్టియు మన ప్రభువైన యేసును గూర్చినట్టియునైన అనుభవ జ్ఞానము వలన మీకు కృపయు సమాధానమును విస్తరించును గాక. ఆ మహిమ గుణాతిశయములనుబట్టి ఆయన మనకు అమూల్యములును అత్యధికములునైన వాగ్దానములను అనుగ్రహించియున్నాడు. దురాశను అనుసరించుటవలన లోకమందున్న భ్రష్టత్వమును ఈ వాగ్దానముల మూలముగా మీరు తప్పించుకొని, దేవస్వభావమునందు పాలివారగునట్లు వాటిని అనుగ్రహించెను. (2 పేతురు 1:3-4)

ఈ వ్యాసం క్రైస్తవ శిష్యత్వం యొక్క ప్రాథమిక అంశాలు అనే సేకరణలో భాగం.

ఈ వ్యాసం మొదట లిగోనియర్ మినిస్ట్రీస్ బ్లాగ్‌లో ప్రచురించబడింది.