నేను జ్ఞానంలో ఎలా ఎదగగలను?

మనం పరస్పరం విరుద్ధమైన విషయాలు గల లోకంలో జీవిస్తున్నామని బైబిల్ మనకు బోధిస్తుంది. వాటిలో జ్ఞానం మరియు అవివేకం ఉన్నాయి. ఈ రెండూ వ్యక్తుల జీవితాలను తీర్చిదిద్దే విభిన్న మార్గాలను సూచిస్తాయి. జ్ఞానం జీవ మార్గంతో, అవివేకం మరణ మార్గంతో ముడిపడి ఉన్నాయి.

జ్ఞానాన్ని తరచుగా ఆచరణాత్మక జ్ఞానంగా లేదా జ్ఞానాన్ని నైపుణ్యంగా ఉపయోగించడంగా నిర్వచిస్తారు. క్రైస్తవులుగా, సొలొమోను మాటలను గుర్తుంచుకోవడం ద్వారా మనం దీనిని ఒక అడుగు ముందుకు తీసుకెళ్లాలి: “యెహోవాయందు భయభక్తులు కలిగియుండుట తెలివికి మూలము” (సామెతలు 1:7). బైబిలు ప్రకారం, జ్ఞానం దేవుని గురించిన జ్ఞానాన్ని జీవితానికి వర్తింపజేస్తుంది, లేదా మరో విధంగా చెప్పాలంటే, జ్ఞానం అనేది దైవభక్తితో జీవించే నైపుణ్యం.

జీవితంలోని ప్రతి రంగంలో ఆ నైపుణ్యం అవసరం. మన మాటలలో, సంబంధాలలో, కుటుంబాలలో, వృత్తులలో, భావోద్వేగాలలో, లైంగికతలో, నాయకత్వంలో, పౌరసత్వంలో, ప్రణాళికలలో, మరియు వనరుల నిర్వహణ ఇంక వినియోగంలో మనం జ్ఞానాన్ని కలిగి ఉండాలి. మన దైనందిన జీవితంలో జ్ఞానం అవసరం లేనిది ఏదీ లేదు, ఎందుకంటే దేవునికి ఘనత మరియు మహిమ కలుగుటకై అన్ని విషయాలలో నైపుణ్యంతో జీవించడమే మన లక్ష్యం.

అయితే మనం జ్ఞానంలో ఎలా ఎదగగలం? మనం ఏ నైపుణ్యంలోనైనా ఎలా ఎదుగుతామో ఆలోచించడం బహుశా ఉపయోగకరంగా ఉంటుంది. మనం ఏదైనా పనిని చక్కగా చేయాలని నేర్చుకోవాలనుకున్నప్పుడు, దానికి ఉద్దేశపూర్వకమైన కృషి, సూచనలు మరియు ఆచరణ అవసరం. జ్ఞానం అనే నైపుణ్యంలో ఎదగడం కూడా దీనికి భిన్నం కాదు.

ఉద్దేశపూర్వకమైన కృషి

జ్ఞానమనే నైపుణ్యం అనేది మనం అడిగేది మరియు వెతికేది కూడా. అంతిమంగా, జ్ఞానం అనేది యేసు క్రీస్తు ద్వారా మనకు ఇవ్వబడిన ఒక వరం. యేసునందు “జ్ఞానమును తెలివియు సమస్త నిధులు” దాచబడి ఉన్నాయని అపొస్తలుడైన పౌలు చెబుతున్నాడు (కొలొస్సయులకు 2:3). పౌలు వేరొకచోట చెప్పినట్లుగా, మన ప్రభువు తాను ఎన్నుకున్న వారి కొరకు ఆ జ్ఞానాన్ని కలిగియున్నాడు; ఆయన “దేవుని నుండి మనకు జ్ఞానముగా ఉండెను” (1 కొరింథీయులకు 1:30). దేవుని కుటుంబంలోకి దత్తత తీసుకోబడిన మనకు, యేసు ద్వారా జ్ఞానం వాగ్దానం చేయబడింది. అది అడగడానికి మనకు ధైర్యాన్ని, మరియు మన ఉదార ​​దేవుడు ఇస్తాడనే నిశ్చయతను ఇస్తుంది (యాకోబు 1:5). అయితే, జ్ఞానాన్ని ఇవ్వడం అనేది దానిని పొందే సాధనాలపై ఆధారపడి ఉంటుంది.

ఉద్దేశపూర్వకమైన ప్రయత్నం ద్వారానే జ్ఞానంలో ఎదుగుదల వస్తుందని బైబిలు బోధిస్తుంది. జ్ఞానం పుట్టుకతో వచ్చే లక్షణం కాదు, వయసుతో పాటు దానంతట అదే రాదు. మళ్ళీ, జ్ఞానవంతుడైన రాజు మనం దానిని వెంబడించాలని నిర్దేశిస్తున్నాడు:

వెండిని వెదకినట్లు దాని వెదకిన యెడల 

దాచబడిన ధనమును వెదకినట్లు దాని వెదకిన యెడల

యెహోవాయందు భయభక్తులు కలిగియుండుట యెట్టిదో నీవు గ్రహించెదవు 

దేవునిగూర్చిన విజ్ఞానము నీకు లభించును. (సామెతలు 2:4-5)

అడగడం మరియు వెతకడం ద్వారా మనం జ్ఞానంలో ఎదుగుతాము: “అడుగుడి మీకియ్యబడును. వెదకుడి మీకు దొరకును” (మత్తయి 7:7).

దేవునిచే ఉపదేశించబడటం

నైపుణ్యాలలో వృద్ధి చెందడానికి శిక్షణ అవసరం, జ్ఞానం విషయంలో కూడా అంతే. మనం దేవుని వాక్యము మరియు లోకము నుండి జ్ఞానాన్ని నేర్చుకుంటాము. బైబిలు ఇలా చెబుతోంది,

యెహోవాయే జ్ఞానమిచ్చువాడు 

తెలివియు వివేచనయు ఆయన నోటనుండి వచ్చును . (సామెతలు 2:6)

లేఖనాల నుండి ఉపదేశం అనేక విధాలుగా వస్తుంది, కానీ తల్లిదండ్రులు తమ పిల్లలకు జ్ఞానాన్ని బోధించడం యొక్క విలువను బైబిల్ నిరంతరం నొక్కి చెబుతుంది. సామెతల గ్రంథంలోని మొదటి భాగం ఒక తండ్రి తన కుమారునికి బోధించే రూపంలో ఉండటం ద్వారా సొలొమోను దీనిని స్పష్టంగా ఆచరించి చూపాడు. ఆయన ఇలా అంటాడు:

కుమారులారా, తండ్రి యుపదేశము వినుడి 

మీరు వివేకమునొందునట్లు ఆలకించుడి 

నేను మీకు సదుపదేశము చేసెదను 

నా బోధను త్రోసివేయకుడి. 

నా తండ్రికి నేను కుమారుడుగా నుంటిని 

నా తల్లి దృష్టికి నేను సుకుమారుడనైన యేక కుమారుడనైయుంటిని. ఆయన నాకు బోధించుచు నాతో ఇట్లనెను 

“నీ హృదయము పట్టుదలతో నా మాటలను పట్టుకొననిమ్ము” (సామెతలు 4:1–4).

తిమోతి ఉదాహరణ కూడా మనకు ప్రోత్సాహాన్ని ఇస్తుంది. అతడు చిన్నప్పటి నుంచే రక్షణార్థమైన జ్ఞానము కలిగించే శక్తిగల పరిశుద్ధలేఖనములను ఎరిగి ఉన్నాడు (2 తిమోతి 3:15). అతని తల్లి మరియు అవ్వ అతనికి ఆ జ్ఞానాన్ని బోధించినప్పుడు, అతడు వారి ఉపదేశాలను శ్రద్ధగా విన్నాడని భావించడానికి బలమైన కారణం ఉంది (2 తిమోతి 1:5 చూడండి).

సృష్టి కూడా దేవుని జ్ఞానం గురించి మనకు బోధించగల ఒక గ్రంథం. ఎందుకంటే సృష్టిలో జ్ఞానానికి భాగం ఉంది, కాబట్టి జ్ఞానం యొక్క ముద్ర ప్రతిచోటా ఉంది (సామెతలు 8:22–31). గుర్తుండేదిగా, సామెతల గ్రంథం చివరలో ఆగూరు పలికిన మాటలు,

భూమిమీద చిన్నవి నాలుగు కలవు 

అయినను అవి మిక్కిలి జ్ఞానముగలవి . (సామెతలు 30:24–28)

ఆయన చీమ, చిన్న కుందేలు, మిడత మరియు బల్లి యొక్క జ్ఞానాన్ని పేర్కొంటూ ముందుకు సాగుతాడు. సృష్టిలోని చిన్న మరియు అల్పమైన భాగాలు కూడా నైపుణ్యంతో, దైవభక్తితో కూడిన జీవితానికి కావలసిన సూత్రాలను మనకు బోధిస్తాయి.

జ్ఞానాన్ని అమలు చేయడం

మనం ఒక పనిని చేయడానికి నిబద్ధతతో ఉంటే తప్ప ఏ నైపుణ్యమూ లభించదు లేదా బలపడదు. సొలొమోను ఇలా అన్నాడు,

నా కుమారుడా, నా ఉపదేశమును మరువకుము 

నా ఆజ్ఞలను హృదయపూర్వకముగా గైకొనుము . (సామెతలు 3:1)

అందుకే జ్ఞానాన్ని, అవివేకాన్ని ఒక మార్గంతో పోలుస్తారు—దారి యొక్క ముఖ్య ఉద్దేశ్యం దానిపై అడుగు పెట్టి నడవడమే. మనం జ్ఞానంలో ఎదగాలంటే, జ్ఞానాన్ని కేవలం వినేవారంగానే కాకుండా, దానిని ఆచరించేవారిగా కూడా అభ్యాసం చేయాలి. అలా చేసినప్పుడు, మనం నెమ్మదిగా ముందుకు సాగవచ్చు, కానీ మన ఎదుగుదల ఖాయం:

పట్టపగలగువరకు వేకువ వెలుగు తేజరిల్లునట్లు 

నీతిమంతుల మార్గము అంతకంతకు తేజరిల్లును, 

భక్తిహీనుల మార్గము గాఢాంధకారమయము 

తాము దేనిమీద పడునది వారికి తెలియదు. (సామెతలు 4:18–19)

జ్ఞానంలో ఎదగడం అనేది ఏదైనా నైపుణ్యాన్ని నేర్చుకుని, దానిలో ఎదగడానికి భిన్నమైనది కాదు. చాలా సాధారణ పద్ధతిలో, మనం ఉద్దేశపూర్వకమైన ప్రయత్నంతో దానిని అనుసరిస్తాము, వాక్యం మరియు సృష్టి నుండి నిరంతర ఉపదేశాన్ని పొందుతాము, మరియు దాని సూత్రాలను ఆచరణలో పెడుతూ, యేసు కృప ద్వారా రాబోయే లోకంలో పరిపూర్ణులమయ్యే వరకు నైపుణ్యమైన దైవభక్తితో జీవిస్తాము.

ఈ వ్యాసం మొదట లిగోనియర్ మినిస్ట్రీస్ (Ligonier Ministries) బ్లాగ్‌లో ప్రచురించబడింది.