హెబ్రీయుల పత్రిక గురించి మీరు తెలుసుకోవలసిన మూడు విషయాలు

హెబ్రీయుల పత్రికలోని మౌలిక సత్యాలను అర్థం చేసుకోవడానికి ఒక మార్గం ఏమిటంటే మూడు కీలకమైన క్రైస్తవ సిద్ధాంతాలకు ఈ పత్రిక అందించిన అనివార్యమైన సహకారాన్ని పరిశీలించడం.

1. నిబంధన వేదాంతాన్ని అర్థం చేసుకోవడానికి హెబ్రీయుల పత్రిక ఎంతో ప్రాముఖ్యమైనది.

బైబిలులోని నిబంధన వేదాంతాన్ని (Covenant Theology) అర్థం చేసుకోవడానికి, క్రొత్త నిబంధన పత్రికలన్నిటిలో హెబ్రీయుల పత్రిక అత్యంత ముఖ్యమైనదని నేను చెప్పగలను. ఒక వ్యక్తికి బైబిలు నిబంధనల గురించి ఎటువంటి అవగాహన ఉన్నప్పటికీ, హెబ్రీయుల పత్రికను వారు వ్యాఖ్యానించే విధానం ఆ అవగాహనను గణనీయంగా ప్రభావితం చేస్తుంది. ఇది పాత నిబంధన యొక్క ఉద్దేశ్యాన్ని, మరియు క్రొత్త నిబంధనతో దానికున్న సంబంధాన్ని విశ్లేషిస్తుంది. పాత నిబంధనను చదవడానికి ఇది ఒక వివరణాత్మక దృక్పథం (Interpretive lens) వంటిది.

హెబ్రీయుల పత్రిక పాత నిబంధనను తక్కువ చేసి చూపుతుందని పాఠకులు పొరపాటుగా భావించే అవకాశం ఉంది.  కానీ అది ఎంతమాత్రం నిజం కాదు. పాత నిబంధన తాత్కాలికమైనదైనప్పటికీ, దానిని దాని సంపూర్ణ మహిమలో చూసినప్పుడే క్రొత్త నిబంధన యొక్క వైభవం మరింత ప్రకాశిస్తుంది. ఈ వ్యత్యాసాన్ని మనం ఇందులోని అనేక “ఒకవేళ/అయితే” (if/then) వాక్యాలలో గమనించవచ్చు (హెబ్రీ. 2:1-4; 9:13-14; 12:25 చూడండి). క్రొత్త నిబంధన పాత నిబంధనను రద్దు చేయడం లేదు, కానీ దానిని పరిపూర్ణం (consummates) చేస్తుంది. ఇది మనం మొత్తం బైబిలును చదివే విధానాన్నే మారుస్తుంది. లేఖనాన్ని లేఖనమే వివరిస్తుంది (Scripture interprets Scripture) అని హెబ్రీయుల పత్రిక మనకు చూపిస్తుంది. మనం పాత, క్రొత్త నిబంధనలను ఒకదానికొకటి విరుద్ధమైనవిగా చూడకూడదు; బదులుగా వాటి మధ్య ఉన్న సరైన సంబంధాన్ని – అనగా నీడ మరియు నిజస్వరూపం (shadow and substance), వాగ్దానం మరియు నెరవేర్పుగా గుర్తించాలి.

క్రొత్త నిబంధన యుగంలో జీవించడం అనేది ఎంతటి మహిమాన్వితమైన ఆధిక్యతో, ఎంతటి గంభీరతతో (gravity) కూడుకున్నదో వివరించడానికి రచయిత ఎంతో ఆసక్తిని కనబరుస్తున్నాడు (హెబ్రీ. 1:2–3 చూడండి). మనం మరింత శ్రేష్ఠమైన (హెబ్రీ. 8:6), మరియు దోషరహితమైన (హెబ్రీ. 8:7–8) నిబంధన పరిపాలనలో ఉన్నాము గనుక, దీని ప్రాముఖ్యత మరియు బాధ్యత కూడా ఎంతో ఎక్కువ. ఇక్కడ హెచ్చరికలు మరింత కఠినమైనవి, వాగ్దానాలు మరింత మధురమైనవి, అంచనాలు కూడా ఉన్నతమైనవి. ఇది క్షణికమైన నిబంధన కాదు – ఇది నిత్య నిబంధన (హెబ్రీ. 13:20).  “దేవుని వాగ్దానములన్నియు ఆయనలో ‘అవును’ అన్నట్లుగా ఉన్నవి” అని అపొస్తలుడైన పౌలు 2 కొరింథీయులకు 1:20లో చెప్పిన మాటలను హెబ్రీయుల పత్రిక సవివరంగా నిరూపిస్తుంది. వివిధ పరిపాలనా రూపాలలో ఉన్న ఆ ఏకైక కృపా నిబంధన (covenant of grace), క్రీస్తు రాకతో వికసించింది. హెబ్రీయుల పత్రిక ప్రకారం, ఈ సత్యమే సమస్తాన్ని మారుస్తుంది. మీరు హెబ్రీయుల పత్రికను చదివేటప్పుడు, క్రొత్త నిబంధనలోని ఆ మహిమలను గమనించండి.

2. క్రీస్తు శాస్త్రాన్ని అర్థం చేసుకోవడానికి హెబ్రీయుల పత్రిక ఎంతో ప్రాముఖ్యమైనది.

క్రొత్త నిబంధన యొక్క మధ్యవర్తి (Mediator) కారణంగానే ఆ నిబంధన ఇంతటి మహిమాన్వితమైనదిగా ఉంది. దేవుని కృపా నిబంధన ఫలాలను అనుభవించడానికి విశ్వాసమే మార్గమైతే (ఎల్లప్పుడూ అలాగే ఉంది), మన విశ్వాసానికి మూలమైన ఆ వ్యక్తి, ఆ విశ్వాస భారాన్ని మోయగల శక్తి మరియు సంసిద్ధత కలిగినవాడై ఉండాలి. పాత నిబంధనలోని ప్రతి ‘నీడ’కు నిజస్వరూపం (substance) గాను, మన విశ్వాసానికి మరియు ఆరాధనకు అత్యున్నత గమ్యంగాను ఉన్న క్రీస్తు యొక్క ఆధిపత్యాన్ని (supremacy) హెబ్రీయుల పత్రిక నిస్సందేహంగా స్థాపిస్తుంది.

హెబ్రీయుల పత్రికలో, మనకు అనుకూలమైన రీతిలో మలచుకున్న (domesticated) యేసుక్రీస్తుకు ఏమాత్రం తావులేదు. ఆయన దేవుని మహిమ యొక్క ప్రకాశము, ఆయన తత్వము (nature) యొక్క ఖచ్చితమైన ముద్ర (Heb. 1:3); తన శక్తిగల మాట చేత సమస్తాన్ని నిర్వహించేవాడు ఆయనే. ఆయన నిత్య కుమారుడు, దేవదూతల కంటే శ్రేష్ఠుడు, మోషే కంటే గొప్పవాడు; తనను తాను ఒక్కసారే బలిగా అర్పించుకున్న అంతిమ మహా ప్రధాన యాజకుడు. దేవదూతల నుండి మొదలుకొని, పాత నిబంధనలో ప్రభువు స్వయంగా నియమించిన మహిమాన్విత పదవులైన – ప్రవక్తలు, యాజకులు, మరియు రాజుల వరకు సమస్తము కంటే ఆయన అత్యున్నతుడు.

మనం ఇప్పటికే చూసినట్లుగా, పాత నిబంధన కంటే శ్రేష్ఠమైన ఆ క్రొత్త నిబంధన యొక్క నిజస్వరూపం (substance) ప్రభువైన యేసుక్రీస్తే (హెబ్రీ. 7:22). క్రైస్తవ జీవితం అనేది అస్పష్టమైన ఆధ్యాత్మికత (vague spirituality) కాదు; అది క్రీస్తుతో మనకున్న ఆత్మీయ ఐక్యత (mystical union) నుండి ప్రవహించే, మహిమాన్వితుడైన క్రీస్తు పట్ల మనకుండే స్పష్టమైన నిబంధనాపరమైన విధేయత (covenantal allegiance) అని హెబ్రీయుల పత్రిక నొక్కి చెబుతోంది. కాబట్టి, ఆయనే మన ప్రేమకు పాత్రుడు, మన నిరీక్షణకు లంగరు, మన విశ్వాసానికి కేంద్రబిందువు అయి ఉండాలి. మీరు హెబ్రీయుల పత్రికను చదివేటప్పుడు, యేసుక్రీస్తు మహిమను దర్శించండి.

3. సంఘశాస్త్రాన్ని అర్థం చేసుకోవడానికి హెబ్రీయుల పత్రిక ఎంతో ప్రాముఖ్యమైనది.

హెబ్రీయుల పత్రికలో కనిపించే ఈ సంఘశాస్త్ర సంబంధిత అంతర్దృష్టి, ఇందులోని క్రీస్తుశాస్త్ర మరియు నిబంధన బోధలంత స్పష్టంగా ఆధునిక పాఠకులకు కనిపించకపోవచ్చు, కానీ ఇది కూడా అంతే ప్రాముఖ్యమైనది. హెబ్రీయుల పత్రికా రచయిత అరణ్య తరాన్ని కేవలం ఒక చారిత్రక ఉదాహరణగా మాత్రమే చూడటం లేదు; సంఘం యొక్క ఉనికిని, దాని గుర్తింపును ఆయన ఆ అరణ్య ప్రయాణ దృక్పథంలోనే (wilderness framework) గుర్తిస్తున్నాడు. ఈ గుర్తింపు కేవలం రూపకం (metaphorical) కాదు; అది పూర్వచిత్రణాత్మకమైనది (typological). అంటే, నేటి సంఘం కేవలం అరణ్యంలోని ఇశ్రాయేలు వంటిది మాత్రమే కాదు; వాస్తవానికి, ఆనాటి యాత్రికులైన దేవుని ప్రజల యొక్క క్రొత్త నిబంధన కొనసాగింపే ఈ సంఘం.¹

హెబ్రీయుల పత్రిక అంతటా ‘యాత్ర’ (pilgrimage)కు సంబంధించిన పరిభాష నిండివుంది: “నిలువరమైన పట్టణము మనకిక్కడ లేదు గాని, ఉండబోవుచున్న దాని కోసము ఎదురు చూచుచున్నాము.” (హెబ్రీ. 13:14). పాత నిబంధన వ్యవస్థలోని సౌకర్యాల వైపు, పాత పద్ధతుల మీద ఉన్న భరోసా వైపు తిరిగి వెళ్లాలని ప్రలోభపడుతున్న తన పాఠకులను – తమ నిజమైన స్వదేశానికి వెళ్లే మార్గంలో పరదేశులుగా, ప్రవాసులుగా పట్టుదలతో కొనసాగాలని రచయిత ప్రోత్సహిస్తున్నాడు. ఈ సంఘశాస్త్ర చిత్రం 3 మరియు 4 అధ్యాయాలలో ఉన్నంత స్పష్టంగా మరెక్కడా కనిపించదు. ఇశ్రాయేలీయులు అరణ్యంలో తిరుగుబాటు చేసినట్లుగా, సంఘం తన హృదయాన్ని కఠినపరచుకోవద్దని ఇక్కడ హెచ్చరించబడింది (హెబ్రీ. 3:7-8).  అవిశ్వాసం కారణంగా ఆ తరం వారు అరణ్యంలోనే మరణించారు. హెబ్రీయుల పత్రిక ఈ కఠినమైన హెచ్చరికలతో పాటు అంతే శక్తివంతమైన ప్రోత్సాహాలను కూడా అందిస్తుంది. దేవుని విశ్రాంతిలో ప్రవేశించే వాగ్దానం ఇంకా నిలిచి ఉంది (హెబ్రీ. 4:1); ఆ విశ్రాంతి, మన బలహీనతలలో మనకు తోడై ఉండే మన మహా ప్రధాన యాజకుడైన క్రీస్తునందే లభిస్తుంది (హెబ్రీ. 4:15). కాబట్టి, సంఘం అనేది పట్టుదల, ఆరాధన మరియు భవిష్యత్తు నిరీక్షణను కలిగిన ఒక నిబంధన సమాజం. ఇది అరణ్యంలో క్రీస్తు చుట్టూ సమకూర్చబడినది, ఆయన వాక్యముతో పోషించబడేది, మరియు పరలోక యెరూషలేము వైపు సాగిపోయేది.

అయితే, మనం ఇంకా లోతుగా పరిశీలించాలి. హెబ్రీయుల పత్రిక లేఖనాలన్నిటిలోనూ పరలోకపు ఆరాధన గురించిన అత్యంత మహిమాన్వితమైన దర్శనాలలో ఒకదానిని మనకు చూపిస్తుంది; ఇది కూడా మన సంఘశాస్త్రానికి ఒక రూపాన్ని ఇస్తుంది. 12వ అధ్యాయంలో, రచయిత సీనాయి పర్వతానికి మరియు సీయోను పర్వతానికి మధ్య ఉన్న వ్యత్యాసాన్ని దాని శిఖరాగ్రానికి (crescendo) తీసుకువెళతాడు. మనం సీనాయి వద్ద ఉన్న భయానక దృశ్యాల చెంతకు కాదు గానీ, “జీవముగల దేవుని పట్టణమును పరలోకపు యెరూషలేమునైన సీయోను కొండకు” వచ్చామని ఆయన చెబుతున్నాడు. అక్కడ మనతో ఎవరున్నారు? “మహోత్సవమునకు కూడిన వేవేలకొలది దేవదూతలు,” “జ్యేష్ఠుల సంఘము,” “అందరి న్యాయాధిపతియైన దేవుడు,” మరియు “క్రొత్త నిబంధనకు మధ్యవర్తియైన యేసు” (హెబ్రీ. 12:22-24). ఇది కేవలం భవిష్యత్తు దర్శనం మాత్రమే కాదు; ఇది ఒక ప్రస్తుత వాస్తవికత. సంఘము ఆరాధన కోసం కూడిన ప్రతిసారీ – ఈ పరలోక సభలో పాలుపంచుకుంటుంది. నిత్య నిబంధన రక్తము (హెబ్రీ. 13:20) మీద ఆధారపడిన ఈ నిబంధన సాధనలో (covenant rehearsal), భూమిపై పోరాడుతున్న సంఘం (church militant), పరలోకంలో విజయం పొందిన సంఘంతో (church triumphant) ఏకమవుతుంది. మీరు హెబ్రీయుల పత్రికను చదివేటప్పుడు, సంఘము యొక్క మహిమను గమనించండి.

ఈ మూడు ప్రధానాంశాలను దృష్టిలో ఉంచుకుని హెబ్రీయుల పత్రికను చదవడం, కేవలం ఈ ఒక్క పుస్తకంలోని సందేశాన్ని మాత్రమే కాకుండా, బైబిలులోని మిగిలిన అరవై ఐదు పుస్తకాల సందేశాన్ని కూడా అర్థం చేసుకోవడానికి మీకు సహాయపడుతుంది.

ఈ వ్యాసం మొదట లిగోనియర్ మినిస్ట్రీస్ (Ligonier Ministries) బ్లాగ్‌లో ప్రచురించబడింది.