అలౌకిక సాహిత్యాన్ని ఎలా అర్థం చేసుకోవాలి?

ఆండ్రియాస్ కోస్టెన్‌బెర్గర్

అలౌకిక సాహిత్యం (Apocalyptic Literature) అనేది అంత్య దినాలకు సంబంధించిన దృశ్యాలను, బోధనలను తరచుగా అత్యంత గుప్త భాషలో తెలియజేస్తుంది. ఈ రచనా శైలిని మరింత స్పష్టంగా అర్థం చేసుకోవడానికి, సొసైటీ ఆఫ్ బిబ్లికల్ లిటరేచర్ అనే బైబిల్ అధ్యయన సంస్థ ఒక ప్రామాణిక నిర్వచనం ఇచ్చింది. దాని ప్రకారం, అలౌకిక సాహిత్యం అనేది “ఒక కథన శైలిలో ఉండే దైవసంబంధమైన ప్రత్యక్షత. ఇందులో ఒక అతీంద్రియ వ్యక్తి (దేవుని దూత), ఒక మానవునికి అద్భుతమైన, భవిష్యత్తుకు సంబంధించిన వాస్తవాలను వెల్లడిస్తాడు.” బైబిల్‌లోని ఈ ప్రత్యేకమైన రచనా శైలిని దాని సాహిత్య లక్షణాల ప్రకారం అర్థం చేసుకోవడానికి, ఈ క్రింది సూత్రాలు మనకు సహాయపడతాయి.

1. అలౌకిక సాహిత్యం  బైబిల్ ప్రవచనంలో ఒక భాగమని గుర్తుంచుకోండి.

ప్రకటన గ్రంథంలో అనేకసార్లు దాని శైలిని “ప్రవచనం” అని పేర్కొన్నారు (ప్రకటన 22:7, 10, 18, 19). పాత నిబంధన ప్రవచనం దేవుని ప్రజల ప్రస్తుత పరిస్థితులను ప్రస్తావిస్తుంది, అదే సమయంలో భవిష్యత్తును గురించి కూడా తెలియజేస్తుంది. అదే విధంగా, ప్రకటన గ్రంథంలో యేసు తన కాలంలోని సంఘాలకు మాటలు పలకడమే కాకుండా (ప్రకటన 2–3), తన మహిమగల పునరాగమనాన్ని, దానికి ముందు, తర్వాత జరిగే సంఘటనలను, మరియు నిత్య స్థితిని (నూతన ఆకాశం, నూతన భూమి) కూడా వివరిస్తుంది. కాబట్టి, ఈ గ్రంథంలో సంకేతాలు ఎక్కువగా ఉన్నప్పటికీ, వాటిని అర్థం చేసుకునేటప్పుడు వాటి చారిత్రక ప్రాధాన్యతను మనం ఎప్పటికీ విస్మరించకూడదు.

2. చిహ్నాలు మరియు వాటి వాస్తవ అర్థాల మధ్య తేడాను గుర్తించాలి

అలౌకిక సాహిత్యం అంత్య దినాల సంఘటనలకు సంబంధించిన స్పష్టమైన, నాటకీయ దర్శనాలను తరచుగా వివరిస్తుంది. ఈ దర్శనాలు నిజమైనవి అయినప్పటికీ, వాటిలో తరచుగా చారిత్రక వ్యక్తులు లేదా సంఘటనలు సంకేత రూపంలో చిత్రీకరించబడతాయి. కాబట్టి, అసలు చిహ్నానికి, దాని ద్వారా సూచించబడిన వాస్తవ వ్యక్తి లేదా సంఘటనకు మధ్య ఉన్న తేడాను మనం జాగ్రత్తగా గుర్తించడం చాలా అవసరం.

ఒక సులభమైన ఉదాహరణ చూస్తే, ప్రకటన గ్రంథం 12–13లో ఒక ఘటసర్పం (డ్రాగన్) మరియు ఒక స్త్రీ అనే రెండు సంకేత పాత్రలు ఉన్నాయి. ఈ ఘటసర్పం సాతానును (అపవాదిని) ఒక దుష్ట శక్తిగా వర్ణిస్తుంది. ఆ స్త్రీ, సంఘాన్ని లేదా దేవుని ప్రజలను సూచిస్తుంది. ఆమెకు మెస్సీయ అనే కుమారుడు జన్మిస్తాడు. ఈ ఘటసర్పం గురించి దాని అర్థం గ్రంథంలోనే స్పష్టంగా ఇవ్వబడింది: “సర్వలోకమును మోసపుచ్చుచు, అపవాదియనియు సాతాననియు పేరుగల ఆది సర్పమైన ఆ మహా ఘటసర్పము పడద్రోయబడెను. అది దాని దూతలతో కలిసి భూమి మీద పడవేయబడింది” (ప్రకటన 12:9). అయితే, కొన్ని సందర్భాలలో వ్యాఖ్యానం స్పష్టంగా ఇవ్వబడదు. అలాంటి సమయంలో, ఒక సంకేతానికి అత్యంత సరైన అర్థాన్ని మనం నిర్ణయించుకోవాలి.

3. సంక్లిష్టమైన అంత్యదినాల ప్రణాళికలు, ముగింపు దృశ్యాలతో కొట్టుకుపోవద్దు, బదులుగా ముఖ్య ఉద్దేశంపై దృష్టి పెట్టండి.

కొంతమందికి అంత్య దినాల గురించి ఎక్కువగా తెలుసుకోవాలని ఆసక్తి ఉంటుంది, కానీ దానివల్ల మనం తప్పుదారి పట్టే అవకాశం ఉంది. కానీ యేసు తన అనుచరులతో చెప్పినట్లుగా, “కాలములను సమయములను తండ్రి తన స్వాధీనమందుంచుకొనియున్నాడు; వాటిని తెలిసికొనుట మీ పనికాదు” (అపొస్తలుల కార్యములు 1:7). దీనికి బదులుగా, ప్రకటన గ్రంథం యొక్క ప్రధాన ఉద్దేశం దేవుని న్యాయాన్ని, నీతిని చూపించడమే. దేవుడు క్రీస్తును విశ్వసించేవారిని తప్పకుండా నిర్దోషులుగా నిరూపిస్తాడు, అవిశ్వాసులకు తీర్పు తీరుస్తాడు. విశ్వాసులు ప్రస్తుత బాధలు, హింసలను ఎదుర్కొంటున్నప్పటికీ, దేవుడు చరిత్రను దాని తుది ముగింపునకు తీసుకువస్తాడని అలౌకిక సాహిత్యం హామీ ఇస్తుంది. యేసు తన మహిమతో తిరిగి వచ్చి, దుష్టులకు తీర్పు తీరుస్తాడు, విశ్వాసులను తన సన్నిధిలోకి తీసుకువెళ్తాడు. అక్కడ వారు నిరంతరం జీవిస్తారు. అదే సమయంలో, దేవుడు అవిశ్వాసులకు క్రీస్తుపై విశ్వాసం ఉంచడానికి ఎన్నో అవకాశాలను ఇచ్చాడని ప్రకటన గ్రంథం స్పష్టం చేస్తుంది. అయితే, వారు పదేపదే నమ్మడానికి నిరాకరించడం వల్లే, వారికి చివరికి తీర్పు జరుగుతుంది.

4. అలౌకిక సాహిత్యాన్ని సంపూర్ణ బైబిల్, విమోచన చరిత్ర ప్రకారం అర్థం చేసుకోండి

బైబిల్‌లో ఉన్న అలౌకిక సాహిత్యం చాలా ప్రాముఖ్యమైనది. ఇది బైబిల్‌కు తుది ముగింపును ఇస్తుంది. బైబిల్ కథ ఒక తోటలో ప్రారంభమై ఒక నగరంలో ముగుస్తుంది. బైబిల్ కథ ఒక పురుషుడు, ఒక స్త్రీతో ప్రారంభమై లెక్కలేనంత మంది జనసమూహం దేవుని సింహాసనం చుట్టూ చేరడంతో ముగుస్తుంది. ఈ రెండు గ్రంథాల ముగింపుల మధ్య, మానవజాతి సృష్టికర్తకు వ్యతిరేకంగా తిరుగుబాటు చేయడం మనం చూస్తాం. దాని ఫలితంగా, లోక పాపమును మోసికొనిపోయే దేవుని గొఱ్ఱెపిల్లగా (యోహాను 1:29, 36) యేసు మొదటి రాకడతో ముగిసిన ఒక గొప్ప రక్షణ కార్యం ప్రారంభమవుతుంది. సువార్త ప్రపంచ దేశాలకు ప్రకటించబడిన తర్వాత, అలౌకిక సాహిత్యం “యూదా గోత్రపు సింహముగా” (ప్రకటన 5:5) యేసు మహిమగల, విజయవంతమైన రెండవ రాకడను వివరిస్తుంది.

అణు విధ్వంసం వంటి అలౌకికలతో భూమి అంతం కావడాన్ని వర్ణించే రంగురంగుల చిత్రాలకు బదులుగా, ప్రకటన గ్రంథం దేవుడు తన ప్రజలతో చేసిన నిబంధన చరిత్ర ముగింపును వివరిస్తుంది. కాబట్టి, ఈ గ్రంథం చివర్లో ఉన్న ఈ ప్రకటన ఒక సరైన ముగింపుగా పనిచేస్తుంది: “ఇదిగో దేవుని నివాసము మనుష్యులతోకూడ ఉన్నది, ఆయన వారితో కాపురముండును, వారాయన ప్రజలైయుందురు, దేవుడు తానే వారి దేవుడైయుండి వారికి తోడై యుండును” (ప్రకటన 21:3).

ఈ వ్యాసం హెర్మెన్యూటిక్స్ (వ్యాఖ్యాన శాస్త్రం) సేకరణలోని ఒక భాగం.

డాక్టర్ ఆండ్రియాస్ జె. కొస్టెన్‌బెర్గర్ ఫెలోషిప్ రాలీలో వేదాంతవేత్త, అలాగే బిబ్లికల్ ఫౌండేషన్స్ సహ-వ్యవస్థాపకుడు. ఆయన ‘ద జీసస్ ఇన్ ద గాస్పెల్స్’, ‘హాండ్బూక్ ఆన్ హెబ్రూస్ త్రు రెవెలేషన్’ వంటి అరవైకి పైగా పుస్తకాలను రాశారు, సవరించారు లేదా అనువదించారు. ఆయనకు, ఆయన భార్య మార్నీకి నలుగురు పెద్ద పిల్లలు ఉన్నారు, వీరు నార్త్ కరోలినాలో నివసిస్తున్నారు.

ఈ వ్యాసం మొదట లిగోనియర్ మినిస్ట్రీస్ బ్లాగ్‌లో ప్రచురించబడింది.